مظفرگڑھ،کرونا وائرس کے خلاف فرنٹ لائن پر لڑنے والے محکمہ صحت کے افسر کی قومی پرچم میں تدفین

مظفرگڑھ (مظفر گڑھ ڈاٹ سٹی۔ 11 مئی2020ء) کرونا وائرس کے خلاف فرنٹ لائن پر لڑنے والے محکمہ صحت کے افسر کی قومی پرچم میں تدفین، ڈپٹی کمشنر کا خراج تحسین۔تفصیل کے مطابق کرونا وائرس کے خلاف فرنٹ لائن پر لڑنے والے محکمہ صحت مظفرگڑھ کے سی ڈی سی آفیسر رانا محمد جمیل جو کہ کرونا وائرس سے فوت ہونے والے مریضوں کی منتقلی،تدفین اور کرونا وائرس سے متاثرہ علاقوں میں جراثیم کش ادویات کے اسپرے جیسے خطرناک کاموں میں پیش پیش رہتے تھے اور ضلع میں کرونا وائرس کے بڑھتے ھوئے کیسز کی وجہ سے شدید ذہنی دباؤ کا شکار تھے۔گذشتہ شام اچانک بلڈ پریشر ہائی ہوجانے سے برین ہیمرج کا شکار ہو کر جاں بحق ہو گئے تھے۔جنہیں آبائی علاقے پیر جہانیاں میں قومی پرچم میں لپیٹ کر سپرد خاک کر دیا گیا۔ نماز جنازہ میں ڈپٹی کمشنر امجد شعیب ترین،ضلعی انتظامیہ کے افسران،سیاسی،سماجی اور صحافتی شخصیات سمیت شہریوں نے ہزاروں کی تعداد میں شرکت کرکے انھیں خراج تحسین پیش کیا۔