مظفرگڑھ ۔ (مظفرگڑھ ڈاٹ سٹی ۔ 07 اکتوبر2019ء) چیئر مین ضلعی اوور سیز کمیٹی مظفرگڑھ غلام مرتضیٰ رحیم کھر نے کہا کہ بیرون ملک مقیم پاکستانی ملک کا سرمایہ ہیں ان کے مسائل کو حل کرنے کیلئے تمام وسائل کو بروئے کار لایا جائے گا، ان کو فوری انصاف کی فراہمی کیلئے عملی اقدمات کئے جائیں گے، انہوں نے کہا کہ پاکستان تحریک انصاف کی حکومت نے سیاست کو خدمت کا درجہ دیا ہے، پہلے بھی عوام کی خدمت کرتے رہے ہیں اوراب بھی وزیر اعظم پاکستان عمران خان اور وزیر اعلیٰ پنجاب سردار عثمان بزدار کی قیادت میں ضلع کی عوام کی خدمت کرتے رہیں گے، کسی کے ساتھ نا انصافی نہیں ہوگی تمام مسائل کو قانون اور میرٹ پر حل کیا جائے گا، انہوں نے کہا کہ وہ ہر سوموار کو ضلعی ہیڈ کوارٹر پر موجود ہوتے ہیں اور ضلع کی عوام کے مسائل کو حل کرنے کیلئے ہر ممکن اقدمات کئے جاتے ہیں، اجلا س میں بیرون ملک مقیم پاکستانیوں کی طرف سے پیش کردہ درخواستوں پر سماعت کی گئی، اجلاس میں بتایا کہ اب تک کمیٹی کو100سے زائددرخواستیں موصول ہوئی ہیں جس میں سے 70سے زائد درخواستوں پر فیصلے کئے جاچکے ہیں، اجلاس میں 26درخواستوں پر سماعت کی گئی اور فریقین اور نے کے نمائندگان سے مسئلہ پر بات کی گئی، اے ڈی سی ریونیو نے ہدایت کی کہ جن درخواستوں پر فیصلے ہوچکے ہیں ان پر فوری عملدآمد کو یقینی بنایا جائے، جن فریقین نے آپس میں معاملات خود طے کر لئے ہیں وہ اپنا تحریری بیان کمیٹی میں جمع کروائیں، انہوں نے مزید کہا جن اوورسیز پاکستانیوں نے کمیٹی میں درخواست دی ہے وہ اپنی یا اپنے نمائندے کی شرکت کو یقینی بنائیں۔انہوں نے مزید بتایا کی اب سائلین ضلعی سطح پر بھی اپنی درخواستیں اے ڈی سی ریونیو کے آفس میں جمع کراسکتے ہیں۔