مظفرگڑھ(مظفرگڑھ ڈاٹ سٹی۔ 27 جنوری2023ء) سویڈن میں قرآن پاک کی بے حرمتی کے خلاف تحریک لبیک علی پور کے زیر اہتمام علی پور میں احتجاجی ریلی نکالی گئی۔ ریلی سے خطاب کرتے ہوئے مقررین نے کہا کہ اسلام کے خلاف کوئی بھی عمل قابل قبول نہیں ہے ۔
ریلی بعد نماز جمعہ مرکزی جامع مسجد سردار بہادر خان سے حافظ محمد سلیمان لاڑ کی زیر قیادت نکالی گئی جس میں شہریوں ، مقامی ، سیاسی ،سماجی اور مذہبی شخصیات نے بڑی تعداد میں شرکت کی ۔
حافظ سلیمان لاڑ نے اپنے خطاب میں کہا کہ یورپی ممالک میں اظہار رائے کی آزادی کی آڑ میں مسلمانوں کے مقدسات کی بے حرمتی کسی بھی شکل میں قابل قبول نہیں ہے ، یہ عالمی امن کو تہہ و بالا کرنے کی بزدلانہ کارروائی ہے ۔ دریں اثنا تحریک لبیک کے زیراہتمام سیت پور خیرپورسادات مڈوالہ اور دیگر علاقوں میں بھی حرمت قرآن ریلیوں کا انعقاد کیا گیا۔