مظفرگڑھ (مظفرگڑھ ڈاٹ سٹی۔ 20 فروری2023ء) ڈپٹی کمشنر آغا ظہیر عباس شیرازی نے کہا ہے کہ تمام پرائس کنٹرول مجسٹریٹس روزانہ کی بنیاد پر بازاروں کا معائنہ کریں،گراں فروشوں،نا جائز منافع خوروں اور ملاوٹ کرنے والوں کے خلاف سخت سے سخت کارروائی کریں تاکہ عوام کو زیادہ سے زیادہ ریلیف مہیا ہوسکے۔یہ بات انہوں نے پرائس کنٹرول مجسٹریٹس کے ساتھ اجلاس کی صدارت کرتے ہوئے کہی۔
انہوں نے کہا کہ تمام پرائس کنٹرول مجسٹریٹس اپنے روزانہ کے اہداف کو ضرور مکمل کریں لیکن کسی کو ناجائز تنگ نہ کریں۔اجلاس میں بتایا گیا کہ اب تک رواں ماہ کے دوران 36 پرائس کنٹرول مجسٹریٹس نے 10 ہزار 104 دکانوں کا معائنہ کیا،خلاف ورزی کرنے پر 20 لاکھ 69 ہزار 500 روپے جرمانہ کیا گیا،45 دکانداروں کے خلاف ایف آئی آرز کا اندراج کیا گیا،6 دکانوں کو سیل کر دیا گیا،جبکہ 5 دکانداروں کو گرفتار کیاگیا۔