مظفرگڑھ (مظفرگڑھ ڈاٹ سٹی۔ 21 دسمبر2022ء) ڈپٹی کمشنر کیپٹن (ر) سمیع اللہ فاروق کی ہدایت پر ضلع بھر میں کھیل کے میدانوں کی اپ گریڈیشن اور بحالی پر کام شروع کر دیا گیا ہے۔ اس ضمن میں ڈپٹی کمشنر کیپٹن (ر) سمیع اللہ فاروق نے ڈپٹی ڈائریکٹر پلاننگ انعم حفیظ اور دیگر حکام کے ہمراہ محمودکوٹ پر زیر تعمیر فیملی پارک اور سپورٹس گرائونڈ کا معائنہ کیا۔
انہوں نے متعلقہ حکام کو کام جلد مکمل کرنے کی ہدایت کی۔ اس موقع پر ڈپٹی کمشنر نے کہا محمودکوٹ روڈ پر فیملی پارک اور سپورٹس گراؤنڈ کی تعمیر کے لیے ٹینڈرز جاری کردیئے گئے ہیں اور منصوبے کو حتمی شکل دینے کے لیے انہوں نے جگہ کا معائنہ کیا ہے۔ ڈپٹی کمشنر مظفرگڑھ نے بتایا کہ فیملی پارک اور سپورٹس گراؤنڈ منصوبے پر 10 دن کے اندر کام شروع کر دیا جائے گا۔
انہوں نے اپنی رائے کا اظہار کرتے بتایا کہ ضلع بھر میں تمام گراؤنڈز کو موجودہ دور کی تمام سہولیات سے آراستہ کر دیا جائے گا تاکہ مظفرگڑھ کی عوام کو کھیلوں اور سیر و تفریح کے لیے بہتر سہولیات میسر آئیں۔ ڈپٹی کمشنر مظفرگڑھ نے مزید بتایا کہ ضلع مظفرگڑھ کی باقی دو تحصیلوں علی پور اور جتوئی میں بھی کھیلوں کے میدانوں کی اپ گریڈیشن اور بحالی کی جا رہی ہے اور وہ خود کھیل کے میدانوں کا جائزہ لے رہے ہیں۔