مظفرگڑھ(مظفرگڑھ ڈاٹ سٹی۔ 22 نومبر2022ء) ریجنل الیکشن کمشنر ڈیرہ غازی خان ڈویژن فضل حکیم نے کہا ہے کہ ووٹ کے اندراج کےلئے ضلع بھر میں 29 سنٹرز قائم کئے گئے ہیں۔یہ بات انہوں نے مظفرگڑھ میں ڈسٹرکٹ الیکشن کمشنر کے آفس میں قائم ون ونڈو سنٹر کا معائنہ کرتے ہوئے کہی۔
انہوں نے کہا ہے کہ الیکشن کمیشن آف پاکستان نے عام انتخابات سے پہلے عوام کی سہولت کو مد نظر رکھتے ہوئے ملک بھر میں ضلعی الیکشن آفس کے ساتھ ساتھ اسسٹنٹ رجسٹریشن آفیسر کے دفاتر میں ووٹ کے اندراج کی سہولت بھی دے دی ہے، عوام اپنے ووٹ کا اندراج ضلعی دفتر یا اسسٹنٹ رجسٹریشن آفیسرز کے دفاتر میں فارم 21پر کر کے کراسکتے ہیں۔
انہوں نے بتایا کہ مظفرگڑھ میں ون ونڈو سنٹر کے علاوہ ضلع بھر میں 29، سنٹر قائم کئے گئے ہیں تاکہ دور دراز کے علاقوں کی عوام با آسانی ووٹ کے اندراج کیلئے فارم 21حاصل کر سکیں اور پر کر کے وہیں جمع کرا سکیں۔ اس موقع پر ڈسٹرکٹ الیکشن کمشنر سید طیب زوار بخاری نے بتایاکہ ووٹ کے اندراج کی مہم کے سلسلے میں مختلف تعلیمی اداروں میں طلباء کو ووٹ کے اندراج بارے آگاہی دی گئی ہے۔