مظفرگڑھ (مظفرگڑھ ڈاٹ سٹی۔ 28 نومبر2022ء) ٹریکٹر ٹرالی الٹ جانے سے 3 افراد زخمی ہوگئے۔ریسکیو کنٹرول روم مظفرگڑھ کے مطابق مظفرگڑھ ملتان روڈ پر محمود ٹیکسٹائل ملز کے قریب ایک ٹریکٹر ٹرالی کا ویل نکل جانے سے ٹریکٹر ٹرالی بے قابو ہو کر سڑک سے 12 فٹ نیچے گہرائی میں جا گری جس کے نتیجے میں 30 سالہ محمد عمر ولد عبدالمجید اور 32 سالہ محمد طارق ولد محمد علی زخمی ہو گئے جبکہ 32 سالہ شاہد ولد نور محمد ٹریکٹر ٹرالی کے نیچے دب گیا۔
ریسکیو ٹیم نے جائے حادثہ پر پہنچ کر فوری طور پر ریسکیو آپریشن جاری کرتے ہوئے حادثے میں زخمی ہونے والے دو افراد کو موقع پر ابتدائی طبی امداد فراہم کی جبکہ ٹرالی کے نیچے پھنسے شخص کو ریسکیو آپریشن کرتے ہوئے ٹرالی کے نیچے سے نکال کر موقع پر ابتدائی طبی امداد فراہم کرنے کے بعد 2 زخمیوں محمد طارق اور شاہد کو ڈسٹرکٹ ہیڈ کوارٹر ہسپتال مظفرگڑھ منتقل کر دیا ہے۔