مظفر گڑھ۔13 دسمبر(مظفر گڑھ ڈاٹ سٹی۔ 13 دسمبر2016ء)کاشتکاروں کو سہولیات و خدمات کی فراہمی کیلئے تمام محکمہ جات اور دیگر اسٹیک ہولڈرز ہنگامی بنیادوں پر اقدامات کریں۔کاشتکار حکومت کی طرف سے مہیا کردہ سہولیات سے فائدہ اٹھائیں۔ کاشتکاروں کے مسائل کے خاتمہ سے ان کی معاشی حالت بہتر اور ملک ترقی کی راہ پر گامزن ہو گا۔ان خیالات کا اظہارڈسٹرکٹ کوآرڈینیشن مظفر گڑھ حافظ شوکت علی نے ڈ سٹرکٹ ایگریکلچر ایڈوائزری کمیٹی کے اجلاس میں کیا۔اجلاس میں مہر عابد حسین ایگزیکٹو ڈسٹرکٹ آفیسرزراعت توسیع مظفر گڑھ، اسسٹنٹ کمشنر مظفر گڑھ ڈاکٹر سیف اللہ، اسسٹنٹ کمشنر کوٹ ادو ظہور احمد بھٹہ،سیکرٹری ڈی آر ٹی اے عروج فاطمہ، ڈسٹرکٹ آفیسر فاریسٹ اینڈ فشریز محمد باقر کاظمی،ڈسٹرکٹ آفیسر سوائل فرٹیلیٹی ڈاکٹر خرم شہزاد،اسسٹنٹ ڈائریکٹر پلانٹ پروٹیکشن محمد سلمان،محکمہ زراعت کے دیگرشعبہ جات، واپڈا، اریگیشن ، پراسیکیوشن کے نمائندوں، کسان بورڈ مظفر گڑھ کے سینئر چیئرمین میاں احسان دھنوتر، جنرل سیکرٹری مہر خالد محمود جانگلہ، کسان اتحاد مظفر گڑھ سے رانا شمشاد احمد، رانا غلام مصطفی اور کاشتکاروں نے کثیر تعداد میں شرکت کی۔اجلاس میں مہر عابد حسین نے سابقہ اجلاس کی کارروائی، احکامات اور ان پر عملدرآمد پر بریفنگ دی۔ انہوں نے ضلع میں جاری مختلف اسکیموں بارے وضاحت کی۔ڈسٹرکٹ کوآرڈینیشن آفیسرمظفر گڑھ نے کہا کہ وزیر اعلیٰ کسان پیکج کے تحت کاشتکاروں کو سہولیات کی فراہمی کو یقینی بنایا جا رہا ہے۔ انہوں نے کہا کہ زراعت کا شعبہ حکومت کی ترجیحات میں شامل ہے۔انہوںنے تمام محکمہ جات کو احکامات دئے کہ وہ اپنے اہداف کے حصول کو بروقت یقینی بنائیں۔