مظفرگڑھ (مظفرگڑھ ڈاٹ سٹی۔ 07 فروری2023ء) 3 موٹر سائیکل سوار مسلح ڈاکوؤں نے مزاحمت کرنے پر غریب ریڑھی مالک کو فائرنگ کرکے شدید زخمی کردیا۔شہریوں نے پیچھا کرنے کے بعد تینوں ڈاکوؤں کو پکڑلیا۔
پولیس ذرائع کے مطابق مظفرگڑھ کے مضافاتی علاقے موضع چک مٹھن میں 3 موٹر سائیکل سوار مسلح ڈاکووں نے کباڑ کی ریڑھی لگانے والے شخص سے 6 ہزار روپے لوٹ لئے،واردات کے دوران غریب ریڑھی مالک جلیل احمد نے مزاحمت کی تو ڈاکوؤں نے فائرنگ کرکے اسے شدید زخمی کردیا،واردات کے بعد اہل علاقہ نے ڈیڑھ کلومیٹر کے فاصلے تک ڈاکوؤں کا پیچھا کیا اور تینوں مسلح ڈاکوؤں کو پکڑلیا ۔
زخمی ہونے والے ریڑھی بان جلیل احمد کو پہلے ڈی ایچ کیو ہسپتال مظفرگڑھ منتقل کیا گیا جہاں سے تشویشناک حالت کے پیش نظر اسے نشتر ہسپتال ملتان ریفر کردیا گیا ہے۔پولیس زرائع کے مطابق تھانہ سول لائن میں واقعے کا مقدمہ درج کرکے ملزمان سے تفتیش کی جارہی ہے۔