مظفرگڑ ھ (مظفرگڑھ ڈاٹ سٹی۔ 27 جولائی2022ء) کمشنر ڈی جی خان عثمان انور نے کہا ہے کہ ڈویژن بھر میں پائیدار اور مستقل بنیادوں پر قیام امن کیلئے تمام دستیاب وسائل کو بروئے کار لایاجا ئے گا، تمام مکاتب فکر کے علماء و مشائخ، سول سوسائٹی، انجمن تاجران، انتظامیہ اور پولیس مل کر کام کریں گے اور بھائی چارے، روادری اور ہم آہنگی کی فضا کو پروان چڑھائیں گے اور مثالی امن قائم کریں گے یہ بات انہوں نے مظفرگڑھ ڈی سی آفس میں امن کمیٹی کے اجلاس کی صدارت کرتے ہوئے کہی۔
آر پی او محمد سلیم بھی ان کے ہمراہ تھے۔ اجلاس میں ڈپٹی کمشنر علی عنان قمر، ڈی پی او طارق ولایت،ایڈیشنل ڈپٹی کمشنر ریونیو محمد شاہ رخ، ایڈیشنل ڈپٹی کمشنر جنرل احسان الحق، اسسٹنٹ کمشنر مظفرگڑھ جمیل حیدر شاہ، ڈی او ریسکیو 1122ڈاکٹر میاں حسین، سی ای او صحت ڈاکٹر فیاض احمد، انجمن تاجران سے سید امیر حسن، شیخ عامر سلیم، مولانا عبدالمعبود آزاد، قاری عبدالغنی ثاقب، غضنفر عباس نقوی، مدثر کاظمی، علی حیدر زیدی سمیت تمام مکاتب فکر کے جید علماء و مشائخ اور متعلقہ محکموں کے ضلعی افسران نے شرکت کی۔
انہوں نے مجالس اور جلوسوں کے منتظمین کو ہدایت کی کہ تلاشی کے عمل کو یقینی بنایا جائے اور اپنی ارد گرد کے ماحول پر نظر بھی رکھی جائے، تمام افراد کے مکمل تعاون سے ہی امن کو یقینی بنایا جاسکتا ہے۔انہوں نے مزید کہا کہ ہم نے اپنے اتحادکو قائم و دائم رکھنا ہے کسی شر پسند کو امن کی راہ میں رخنہ نہیں ڈالنے دیا جائے گا، انہوں نے بتایا کہ امن کو قائم رکھنے کیلئے رینجر او رپاک آرمی کے مدد بھی حاصل ہے۔
ڈپٹی کمشنر علی عنان قمر نے کہا کہ ضلع بھر میں تمام جلوسوں کے روٹس کا وزٹ کیا جارہا ہے، راستوں کی صفائی ستھرائی، تعمیرو مرمت کے کام اور روشنی کے انتظامات کو یقینی بنایا جارہا ہے۔علماء و مشائخ سے مکمل رابطے میں ہیں، ضلع میں مجموعی طور پر امن و امان کی فضا قائم ہے۔ ڈی پی او طارق ولایت نے کہا کہ تھانہ او تحصیل کی سطح پر لائسنسداران کے ساتھ میٹنگ کی جاچکی ہیں، مرکزی جلوسوں کے روٹس کو چیک کیا جاچکا ہے اور روزانہ کی بنیاد پر روٹس چیک کررہے ہیں اور تمام مسائل کو مل بیٹھ کر حل کیا جارہا ہے۔
اجلاس میں مدثر کاظمی، قاری عبدالغنی ثاقب، سید امیر حسن، علی حیدر زیدی، مولانا عبدالمعبود آزد،اختر بخاری اور غضنفر عباس نقوی نے اپنے اپنے خیالات کا اظہار کرتے ہوئے کہا کہ یہ ہمارا ضلع ہے یہاں پر قیام امن ہم سب کی ذمہ داری ہے، ہم سب امن کیلئے متحد ہیں ہم میں کوئی اختلاف نہیں ہے اور ایک دوسرے سے مکمل رابطے میں ہیں، انتظامیہ اور پولیس بھی مکمل تعاون کررہی ہے۔انہوں نے کہا کہ کسی سطح پر کسی کو شکایت کا موقع نہیں دیا جائے گا اور ضلع کے امن کو مثالی بنایا جائے گا۔\378