مظفرگڑھ(مظفرگڑھ ڈاٹ سٹی۔ 02 فروری2023ء) مظفرگڑھ میں ملتان روڈ پر سنکی بند کے قریب مسافر بس اور کار میں تصادم سے3 افراد جاں بحق اور ایک زخمی ہوگیا ہے۔ ریسکیو کنٹرول روم مظفرگڑھ کے مطابق گزشتہ شب اڑھائی بجے کے قریب مظفرگڑھ ملتان روڈ پر سنکی بند کے قریب مسافر بس اور کار کے درمیان خوفناک تصادم کے نتیجے میں نواحی علاقے روہیلانوالی کے رہائشی 35 سالہ سید سجاد شاہ ، 57 سالہ میاں عمران اور 40 سالہ اللہ بخش موقع پر جاں بحق ہو گئے جبکہ 30 سالہ سجاد حسین شدید زخمی ہو گیا ہے۔
اطلاع ملنے پر ریسکیو کنٹرول روم نے فوری طور پر جائے حادثہ پر 2 ایمبولینسز اور ریسکیو وہیکل کو روانہ کروا کرپولیس کنٹرول کو بھی انفارم کر دیا، ریسکیو سٹاف نے جائے حادثہ پر پہنچ کر زخمی کو ابتدائی طبی امداد فراہم کرنے کے بعد اور تینوں ڈیڈ باڈیز کو ڈیڈ شیٹ سے ڈھانپنے کے بعد ڈسٹرکٹ ہیڈکوارٹر ہسپتال مظفرگڑھ منتقل کر دیا ہے۔پولیس تھانہ صدر نے بس اور کار کو تحویل میں لے کر ضابطے کی کارروائی شروع کر دی ہے،اطلاعات کے مطابق حادثہ تیزرفتاری اور لاپرواہی کے باعث پیش آیا ہے۔