مظفرگڑھ (مظفرگڑھ ڈاٹ سٹی۔ 12 جون2020ء) پاکستان میڈیکل ایسوسی ایشن کے اعلامیہ کے مطابق ڈسٹرکٹ ہیڈکوارٹر ہسپتال مظفرگڑھ میں آئسولیشن وارڈ ختم کرکے 26 بیڈز پر مشتمل ہائی ڈیپینڈنسی یونٹ قائم کر دیا گیا ہے۔ سینئر نائب صدر پی ایم اے مظفرگڑھ ڈاکٹر مقبول عالم کے مطابق ڈپٹی کمشنر مظفرگڑھ امجد شعیب ترین اور ایم ایس ڈی ایچ کیو ہسپتال مظفرگڑھ ڈاکٹر مہر محمد اقبال نے کورونا مریضوں کی بڑھتی ہوئی تعداد کے پیش نظر یہ فیصلہ کیا ہے۔ڈی ایچ کیو ہسپتال مظفر گڑھ کے آئیسولیشن وارڈ میں پچھلے دس دنوں سے کورونا کی پیچیدگیوں کے شکار مریضوں کو داخل کیا جا رہا تھا اور ان کا علاج جاری تھا۔ انڈس ہسپتال مظفرگڑھ کی گنجائش ختم ہونے کا اندازہ کرتے ہوئے ڈپٹی کمشنر مظفرگڑھ انجینئر امجد شعیب خان ترین اور ایم ایس ڈی ایچ کیو ہسپتال مظفر گڑھ ڈاکٹر مہر محمد اقبال نے یہ فیصلہ کیا کہ چونکہ اب پچھلے دس دنوں سے آئیسولیشن وارڈ میں بھی سیریس مریض ہی آ رہے ہیں جنہیں مستقل آکسیجن اور دیگر پیچیدگیوں کے علاج کی ضرورت ہے اس لیے آئیسولیشن اب گھروں میں ہو گی۔اس لیے فوری طور پر آئیسولیشن وارڈ کو ختم کر کے اس کے سترہ بیڈز اور ڈائیلسز بلڈنگ کے ایک حصہ میں نو بیڈز یعنی کل چھبیس بیڈز کے ہائی ڈیپینڈنسی یونٹ کا قیام عمل لایا گیا ہے جہاں سپیشلسٹ ڈاکٹرز کے زیر نگرانی کورونا سے متاثرہ، سیریس نمونیا کے شکار مریضوں کا علاج کیا جائے گا، علاج کے لیے ضروری سامان مہیا کر دیا گیا ہے۔ کورونا وارڈ کے لیے سپیشلسٹ ڈاکٹرز کی ٹیم بنائی گئی ہے جن کی زیرنگرانی دیگر عملہ اپنی بہترین خدمات انجام دے رہا ہے۔