مظفرگڑھ۔ (مظفر گڑھ ڈاٹ سٹی۔ 16 جنوری2019ء) مظفرگڑھ کے قریبی علاقے فتح سہرانی کے سرکاری گرلز اسکول سے 35 بچوں کو نکال دیا گیا،بچوں نے والدین کے ھمراہ ڈپٹی کمشنر مظفرگڑھ کے دفتر کے باھر احتجاجی مظاھرہ کیا انہوں نے ھاتھوں میں پلے کارڈ اٹھا رکھے تھے جن پر علاقے کے ایم پی اے کی تعلیمی اداروں میں مبینہ مداخلت روکنے کے مطالبے درج تھے۔تفصیلات کے مطابق مظفرگڑھ کے علاقے فتح سہرانی کے ارسلان آباد گرلز ایلیمنٹری اسکول کے 35 بچوں کو اسکول سے نکال دیا گیا ھے اور انہیں اسکول میں آنے سے روک دیا گیا ھے ،بچوں کے والدین کا کہنا ھے کہ سیاسی تنازعات کی وجہ سے سیاسی دباو ڈال کر ان کے بچوں کو اسکول سے نکلوایا گیاھے انہوں نے ڈپٹی کمشنر مظفرگڑھ اور اعلی ا حکام سے تعلیمی اداروں میں سیاسی مداخلت بند کرانے کا مطالبہ کیا ھے۔اسکول کی ھیڈمسٹریس سعدیہ نے رابطہ کرنے پر بتایا ھے کے بچوں کے والدین کے اسکول کے نائب قاصد کے ساتھ مقدمہ بازی چل رھی ھے جس کی وجہ سے والدین نے بچوں کو خود اسکول بھیجنا بند کر دیا ھے، اسکول کی ٹیچرز بچوں کو گھر سے بلانے کیلئے بھی گئیں لیکن والدین نے بچوں کو نہیں بھیجا۔ ھیڈمسٹریس نے سیاسی مداخلت اور سیاسی دباو پر بچوں کو اسکول سے نکالنے کے الزام کو یکسر مسترد کر دیا ھے۔