مظفرگڑھ،سابق ایم پی پر زمینوں کے ریکارڈ میں جعل سازی کے الزامات کی تحقیقات کا آغاز

مظفرگڑھ (مظفرگڑھ ڈاٹ سٹی۔ 03 مارچ2023ء) پنجاب اسمبلی کے سابق رکن سردار اظہر عباس چانڈیہ زمینوں کے ریکارڈ میں جعلسازی کے الزامات کی زد میں آ گئے۔ڈپٹی کمشنر اور ڈسٹرکٹ پولیس آفیسر نے جمعرات کے روز متاثرین کی شکایات کی سماعت کی ۔ رانا امجد کوآرڈینٹر سیم سن کمپنی نے بتایا ہے کہ سیم سن کمپنی کے مالک وسیم الرحمٰن خان امپورٹ ایکسپورٹ کا کاروبار کرتے ہیں اور چوک سرور شہید میں بھی سیم سن کمپنی نے علاقہ کے غریب لوگوں کو بہترین روزگار دے رکھا ہے جبکہ یہ کمپنی ضلع کونسل اور دیگر سرکاری اداروں کو بھی سالانہ کروڑوں روپے کا ٹیکس ادا کرتی ہے۔

رانا امجد نے بتایا کہ سابق ایم پی اے اظہر عباس چانڈیہ اور ان کے بیٹوں نے پورے علاقہ میں اپنی دادا گیری قائم کررکھی ہے جو کہ پٹواریوں کی ملی بھگت سے بیرون اضلاع کے لوگوں کو سبز باغ دکھا کر زمین کے لین دین کا اربوں روپے کا دھندہ کرتے ہیں اور خریداروں کوموقع پر دکھائی گئی زمین کی بجائے رقم لینے کے بعد دوسری بنجر زمین لینے پر مجبور کرتے ہیں ۔

رانا امجد نے بتایا کہ سیم سن کمپنی پورے علاقہ میں غریب لوگوں کو روزگار مہیا کرکے فلاحی کاموں میں بھی حصہ لے رہی ہے جبکہ سابق ایم پی اے سردار اظہر عباس چانڈیہ اور ان کے بیٹوں نے سیم سن کمپنی کو دی گئی زمین پر بھی ہیراپھیری کرکے ناجائز قبضہ کرنے کے در پے ہیں ۔