مظفرگڑھ (مظفرگڑھ ڈاٹ سٹی۔ 25 اپریل2022ء) دارالامان میں رہائش پذیر بے سہارا خواتین کو عید کی خوشیوں میں شامل کرنا ہم سب کی ذمہ داری ہے، ہم نے ہی ان کی تمام سہولیات کا خیال رکھنا ہے تاکہ ان بے سہارا خواتین کو احساس محرومی نہ ہو ۔یہ بات ڈویژنل ڈائریکٹر سوشل ویلفیئر چوہدری اظہر یوسف نے دارالامان میں رہائش پزیر خواتین اور بچوں میں عید کے تحائف تقسیم کرتے ہوئے کہی۔
اس موقع پر ان کے ہمراہ انچارج دارلامان عافیہ بلال،ملک خیر محمد بدھ، نجم السلام، سعدیہ نواز، پروفیسر افتخار ہاشمی، ناظم بلوچ، افضل چوہان اورفیاض احمد بھی موجود تھے۔ ڈائریکٹر سوشل ویلفیئر چوہدری اظہر یوسف نے کہا کہ بے سہارا خواتین کے مالی معاونت اور خواتین کی بہبود کیلئے غیر سرکاری تنظیمیں اور مخیر حضرات کی خدمات کو فراموش نہیں کیا جاسکتا۔
انہوں نے سماجی کارکن نجم السلام اور سعدیہ نواز کو شکریہ ادا کیا جنہوں نے دارالامان میں رہائش پزیر خواتین اور بچوں کو عید کیلئے نئے کپڑے اور تحائف فراہم کئے۔ اس موقع پر ملک خیر محمد بدھ نے کہا کہ ضلع کے فلاحی اور سماجی کاموں اور خواتین کی بہبود اور مالی معاونت کیلئے غیر سرکاری تنظیمیں اور نجم السلام جیسے مخیر حضرات بڑھ چڑھ کر حصہ لیتے ہیں۔ \378