مظفرگڑھ (مظفرگڑھ ڈاٹ سٹی۔ 22 اپریل2022ء) علی پور کے علاقے جگمل میں، بااثر وڈیرے کا بکریاں کھیتوں میں داخل ہونے پر، 15 سالہ روزہ دار چرواہے پر مبینہ طور پر بہیمانہ تشدد،بچہ مبینہ طور پر تشدد سے جاں بحق، پولیس کارروائی سے بچنے کے لئے اور خودکشی کا رنگ دینے کے لئے وڈیرے نے بچے کے گلے میں پھندا ڈال کر درخت سے لٹکا کر پھانسی لگا دی۔
پولیس کا کارروائی کرنے میں لیت و لال پر لواحقین کا پولیس اور بااثر وڈیرے کے خلاف احتجاج۔متوفی بچے کے والد محمد ارشد کے مطابق مظفرگڑھ کی تحصیل علی پور میں تھانہ صدر علی پور کے علاقے جگمل میں، ظلم کی انتہا ہو گئی، بااثر وڈیرے فیاض غزلانی نے اپنے نوکر بلال آرائیں کی مدد سے اس کے دسویں کلاس کے طالب علم حافظ قرآن بیٹے 15 سالہ چرواہے محمد محسن کو جو روزے سے تھا اس کی بکری بااثر وڈیرے کے کھیتوں میں داخل ہونے پر مبینہ طور پر بہیمانہ تشدد کا نشانہ بنا ڈالا جس کے نتیجے میں اس کا بیٹا موقع پر جاں بحق ہو گیا۔
ڈی ایس پی علی پور منور بزدار نے پولیس کی جانب سے کارروائی کے حوالے سے میڈیا کو موقف دینے سے انکار کر دیا، کیمرے آن دیکھ کر اور بار بار میڈیا نمائندوں کے اسرار پر ڈی ایس نے موقف دیتے ہوئے بتایا کہ تفتیش جاری ہے قانون کے مطابق کارروائی ہوگی۔ دوسری جانب محمد ارشد نے لواحقین اور علاقہ مکینوں کے ہمراہ احتجاج کرتے ہوئے بتایا کہ یہ وقوعہ آج صبح 9 بجے کا ہے 7 گھنٹے گزر جانے پر بھی پولیس بااثر وڈیرے اور اس کے ملازم کے خلاف کاروائی کرنے میں لیت و لال سے کام لے رہی ہے اور مقدمہ درج کرنے میں تاخیری حربے استعمال کر رہی ہے۔
اس نے دیگر لواحقین کے ہمراہ پولیس اور ملزمان کے خلاف احتجاج کرتے ہوئے نعرے بازی کی اور اعلیٰ حکام سے انصاف فراہم کرنے اور غفلت برتنے پر پولیس کے خلاف بھی کارروائی کا مطالبہ کیا ہے-\378