قرض واپسی کے تقاضے پر نوجوان کو مبینہ طور پر برہنہ کر کے تشدد کرنیوالے7 افراد کے خلاف مقدمہ درج،ایک ملزم گرفتار

پولیس زرائع کے مطابق مظفرگڑھ کی تحصیل کوٹ ادو کے علاقے سنانواں کے موضع ھالہ کے رہائشی محمد صوبن ولد فرید حسین نے محمد شہباز گرمانی ولد بشیر گرمانی کو قرضہ دیا ہوا تھا جس کی واپسی کا اس نے تقاضہ کیا، محمد شہباز نے اسے فون کر کے رقم واپس کرنے کےلئے روف گرمانی کے پولٹری فارم پر بلایا جہاں محمد صوبن کے پہنچنے پرمحمد شہباز نے محمد شیراز گرمانی ،صدام گرمانی، محمد شعیب اور3 نامعلوم افراد کے ہمراہ اسے برہنہ کرکے اس پر شدید تشدد کیا اس کی وڈیوبنائی۔

محمد صوبن کے شور وغوغا پر آس پاس کے لوگوں نے پہنچ کر اس کی جان بخشی کرائی، پولیس تھانہ محمود کوٹ نے محمد صوبن کی مدعیت میں 4 نامزد اور 3 نامعلوم افراد کے خلاف مقدمہ درج کر لیا ، ایس ایچ او تھانہ محمود کوٹ عزیزاللہ خان نے محمد شہباز کو گرفتار کر کے باقی ملزمان کی تلاش شروع کر دی ہے۔