مظفر گڑھ۔19 مارچ(مظفر گڑھ ڈاٹ سٹی۔ 19 مارچ2018ء)عوام کوبلاتعطل طبی سہولیات کی فراہمی حکومت کی اولین ترجیح ہے، ڈیوٹی سے غیر حاضرڈاکٹروں اور دیگر ملازمین کا کڑا احتساب کیا جائیگا۔یہ بات ڈپٹی کمشنر محمد سیف انور نے گزشتہ روزمختلف دیہی مراکز صحت کی جانچ پڑتال کے نتیجے میں ڈیوٹی سے غیر حاضر ڈاکٹرز کے خلاف تادیبی کارروائی کے احکامات جاری کرتے ہوئے کہی، گزشتہ روز ڈپٹی کمشنر محمد سیف انور نے ڈاکٹر شاہد مگسی سی ای او صحت ، ڈاکٹر کاظم خان ، ڈاکٹر اقبال مکول ، ڈی ایچ اوز اور ڈاکٹر پنجتن ، ڈاکٹر امیر بخش ڈاکٹر سعید احمد ڈپٹی ڈی ایچ کے ہمرا دیہی مرکز صحت شہر سلطان ،سیت پور ،خیر پور اور شاہ جمال کا اچانک معائنہ کیا اور ایمرجنسی پر معمور عملہ کی حاضری کا جائزہ لیا، اس موقع پر ڈاکٹر عمر فاروق ،ڈاکٹر نعمان الحق ،ڈاکٹر فرحان گوہر ڈیوٹی سے غیر حاضر پائے گئے جس پر انہیں ایمرجنسی ڈیوٹی سے غیر حاضری کی پاداش میں ایڈہاک ملازمت سے برخاست کئے جانے کی سفارش کی گئی ہے جبکہ ایمرجنسی ڈیوٹی تفویض نہ کئے جانے اور غیر ذمہ دارانہ طرزعمل پر سیت پور اور خیر پور سادات کے سینئر میڈیکل آفیسرز کی جواب طلبی کی گئی ہے ، ڈپٹی کمشنرنے دیہی مرکز صحت شہر سلطان میں ڈاکٹر جمیل کی غیر حاضری اور محمد ناصر چپڑاسی کی جانب سے مریض کو ٹیکہ لگائے جانیکا سخت نوٹس لیتے ہوئے ڈاکٹر کاظم خان اور ڈپٹی ڈی ایچ او جتوئی کو انکوائری آفیسر مقر ر کردیا ہے اور انہیں دو دن میں تفصیلی رپورٹ پیش کرنے کے احکامات جاری کئے ہیں اسکے علاوہ ڈپٹی کمشنر کی ہدایت کی روشنی میں ڈاکٹر شاہد مگسی نے اپنے ایک مراسلہ میں ڈی ایچ اوز اور ڈپٹی ڈی ایچ اوز کو ہدایات جاری کی ہیں کہ وہ روزانہ کی بنیاد پر دیہی مراکز صحت کی مانٹرننگ اور حاضری یقینی بنائیں اور کسی بھی غیر تسلی بخش صورتحال کا فوری نوٹس لیں۔