مظفر گڑھ۔30 مارچ(مظفر گڑھ ڈاٹ سٹی۔ 30 مارچ2018ء)اسسٹنٹ کمشنر مظفرگڑھ ظہور حسین بھٹہ نے کہا ہے کہ ڈپٹی کمشنر مظفرگڑھ محمد سیف انور کی ہدایت پر تحصیل مظفرگڑھ میں گندم کے کاشتکاروں کو باردانہ کی فراہمی کیلئے محکمہ مال نے تحصیل مظفرگڑھ کے 426مواضعات کے کاشتکاروں کی ابتدائی فہرستیں مرتب کر لی ہیں، انہوں نے کہا کہ یہ فہرستیں ڈپٹی کمشنر آفس، اسسٹنٹ کمشنر آفس، تحصیل آفس اور اراضی ریکارڈ آفس میں آویزاں ہیں، تحصیل مظفرگڑھ سے متعلقہ گندم کے کاشتکار یہ فہرستیں چیک کرسکتے ہیں، کسی غلطی کی صورت میں وہ اپنی شکایت متعلقہ ریونیو آفیسر یا نائب تحصیلدار کو جمع کرا سکتا ہے تاکہ اس کا بروقت ازالہ کیا جاسکے، اگر کسی کاشتکار کا نام غلطی سے گندم کے کاشتکاروں میں شامل ہو گیا ہو تو اس کی بھی نشاندہی کی جائے ، انہوںنے بتایا کہ گندم کے کاشتکاروں کو باردانے کی تقسیم حکومت پنجاب کی جاری کردہ پالیسی کے تحت ماہ اپریل میں شروع کی جائیگی۔