مظفرگڑھ (مظفرگڑھ ڈاٹ سٹی۔ 26 نومبر2022ء) ایڈیشنل ڈسٹرکٹ اینڈ سیشن جج نے کوٹ ادو کے مشہور مقدمہ قتل کا فیصلہ سناتے ہوئے ایک مجرم کو سزائے موت سنا دی جبکہ اس کے ساتھی ملزم کو شک کا فا ئدہ دیتے ہوئے بری کر دیا ہے،کوٹ ادو شہر میں 5سال قبل قتل ہونے والے دلاور عباس کے کیس کا فیصلہ ایڈیشنل ڈسٹرکٹ اینڈ سیشن جج کوٹ ادو وسیم انجم نے سناتے ہوئے ایف آئی آر میں نامزد دو ملزمان میں سے صفدر حسین جکھڑ کو سزائے موت اور 6لاکھ روپے جرمانہ کی سزا سنائی جبکہ مقدمہ کے دوسرے ملزم زین کو شک کا فائیدہ دیتے ہوئے بری کردیا ہے۔
2017 میں صفدر جکھڑ اور زین نے کوٹ ادو شہر میں مخدوم فیملی سے تعلق رکھنے والے دلاور عباس اور بلال قاسم پر فائرنگ کی تھی جس کے نتیجے میں دلاور عباس جاں بحق ہو گیا تھا، قتل کا مقدمہ تھانہ سٹی کوٹ ادو میں ڈسٹرکٹ ایکسائز اینڈ ٹیکسیشن آفیسر مخدوم غلام قاسم کی مدعیت میں درج کیا گیا تھا۔5 سال مقدمہ کی سماعت کے بعد فاضل جج نے صفدر جکھڑ کو سزائے موت اور 6 لاکھ روپے جرمانہ کی سزا سنائی ہے جبکہ شریک ملزم زین کو شک کا فا ئدہ دیتے ہوئے بری کر دیا ہے۔