مظفرگڑھ (مظفرگڑھ ڈاٹ سٹی 24 جنوری2023ء) ڈپٹی کمشنر مظفرگڑھ کیپٹن (ر) سمیع اللہ فاروق نے کہا ہے کہ رواں ماہ کے دوران پرائس کنٹرول مجسٹریٹس کی کارکردگی بہتر ہے، جس کی وجہ سے صوبہ بھر میں ضلع مظفرگڑھ کارکردگی کے لحاظ سے نمایاں پوزیشن پر ہے۔انہوں نے کہا کہ اعلیٰ کارکردگی کا مظاہر ہ کرنے والے پرائس کنٹرول مجسٹریٹس کو کارکردگی سرٹیفیکیٹ جاری کئے جائیں گے۔
یہ بات انہوں نے پرائس کنٹرول مجسٹریٹس کے ساتھ ہفتہ وار اجلاس کی صدارت کرتے ہوئے کہی۔
ڈپٹی کمشنر نے کہا کہ ضلع کے تمام پرائس کنٹرول مجسٹریٹس اپنی اپنی کارکردگی کو بہتر بنانے کے لئے زیادہ سے زیادہ دکانوں کو چیک کریں اگر کوئی دکان دار خلاف ورزی کرتا ہے تو اس کو نہ صرف بھاری جرمانے کریں بلکہ اس کے خلاف ایف آئی آر درج کرتے ہوئے گرفتاری عمل میں لائیں اور دکان کو سیل کریں۔
اجلاس میں بتایا گیا کہ رواں ماہ کے دوران 9ہزار سے زائد دکانوں کو چیک کیا گیا، خلاف ورزی پر 17لاکھ 22ہزار روپے جرمانہ، 25ایف آئی آر کا اندراج کیا گیا،8دکانوں کو سیل کیا گیا جبکہ 12دکانداروں کو گرفتار کیا گیا۔ ڈپٹی کمشنرنے کہا کہ جس طرح اب تک تمام پرائس کنٹرول مجسٹریٹس نے محنت کی اور اپنی کارکردگی کو بہتر بنایا آئندہ بھی اس کو بہتر بنانا ہے۔