مظفر گڑھ (مظفر گڑھ ڈاٹ سٹی۔ 09فروی 2015ء) کاشتکار کپاس کی فصل کی کاشت یکم مارچ کے بعدشروع کریں۔فروری کے مہینہ میں درجہ حرارت کم ہونے کی وجہ سے کاشتہ کپاس کا اگاؤ کم اور ننھے پودے مرنا شروع ہو جاتے ہیں۔ اس طرح فی ایکڑ پودوں کی تعداد کم ہو جاتی ہے۔ باقی رہ جانے والے پودے بھی کمزور ہو جاتے ہیں۔اس طرح کم پیداوار کی وجہ سے نا قابل تلافی نقصان کا سامنا کرنا پڑ سکتا ہے۔ان خیالات کا اظہار مہر عابد حسین ڈسٹرکٹ آفیسر زراعت توسیع مظفر گڑھ نے کاشتکاروں کے اجتماع سے خطاب کرتے ہوئے کیا، انہوں نے مزید بتایا کہ15ڈگری سینٹی گریڈ سے کم درجہ حرارت پر کپاس کے پودوں میں خوراک بنانے کا عمل نہایت سست ہو جاتا ہے اور بڑھنے والے ننھے پودے مرنا شروع ہو جاتے ہیں۔جبکہ اچھا اگاؤ حاصل کرنے کے لیے زمین کا نسبتاََ کم از کم درجہ حرارت 20ڈگری سینٹی گریڈ ہونا ضروری ہے ۔انہوں نے مزید کہا کہ اکثر کاشتکار بی ٹی کپاس کی اگیتی کاشت فروری کے مہینہ سے شروع کر دیتے ہیں جبکہ فروری کے مہینہ میں کاشت کی گئی کپاس کی فصل کوکم درجہ حرارت کی وجہ سے نقصان کا سامنا کرنا پڑ سکتا ہے کیونکہ کم درجہ حرارت پر بیج کے اگنے کا عمل سست ہو جاتا ہے اور پھپھوندی کا حملہ زیادہ ہوتا ہے جس سے اگاؤ شدید متاثر ہوتا ہے ۔