موسمیاتی تبدیلیوں کو روکنے کےلئے درخت اہم کردار ادا کر سکتے ہیں،ڈپٹی کمشنرمظفرگڑھ

انہوں نے کہا کہ ہم درخت لگا کر اپنی نسل کو خوشگوار ماحول فراہم کریں گے۔

ڈپٹی کمشنر آغا ظہیر عباس شیرازی نے کہا کہ محکمہ جنگلات کے 15 ایکڑ اراضی پر شجرکاری کی جارہی ہے،جس میں 1 ایکڑ پررجب طیب اردگان ہسپتال میں آنے والے مریضوں اور ان کے لواحقین کی سہولت کے لیے پارک بنایا جائے گا اور 14 ایکڑ اراضی پر جنگل آباد کیا جائے گا۔ انہوں نے کہا کہ منظم پلاننگ کے تحت سکولوں،کالجوں، پارکس،سرکاری دفاتر اور پبلک مقامات پر بڑے درخت لگائے جا رہے ہیں۔ 

انہوں نے کہا کہ تحصیلوں اور ڈسٹرکٹ ہیڈکوارٹر ہسپتالوں میں بھی بڑے پیمانے پر شجرکاری کی جاری ہے جس کا وہ ذاتی طور پر جائزہ لے رہے ہیں۔ انہوں نے بتایا کہ موسم بہاری کی شجر کاری کے تحت ضلع بھر میں سرکاری ادارے 2لاکھ سے زائد پودے لگائیں گے۔اس موقع پرڈسٹرکٹ فاریسٹ آفیسر طارق سناواں نے بتایا کہ آج 400 پودے لگائے ہیں،مجموعی طور پر15ایکڑ جنگلات کے رقبے پر 10 ہزار پودے لگائے جائیں گے۔ 

انہوں نے بتایا کہ پارک میں نمائشی اور سایہ دار درخت لگائے جائیں گے۔جبکہ محکمہ جنگل میں جامن،سیرس،سکھ چین،پلکن اور سایہ دار درخت کے پودے لگائے جائیں گے۔اس موقع پر سی او ایجوکیشن مسعود ندیم،ڈپٹی ڈائریکٹر زراعت عبدلرزاق،چیئر مین سول سوسائٹی ملک خیر محمد بدھ،ایم ایس رجب طیب اردگان ڈاکٹر عرفان سمیت ضلعی محکموں کے سربراہان اور سٹاف نے بھی پودے لگائے۔