مظفر گڑھ ۔ (مظفرگڑھ ڈاٹ سٹی ۔ 13 اگست2019ء) پاکستان بیت المال دس ہزار یتیم بچوں کی مستقل بنیادوں پر کفالت کرے گا اور کارکردگی کو بہتر بنانے کیلئے پاکستان بیت المال کا سسٹم آن لائن کیا جا رہا ہے۔ ان خیالات کا اظہار پاکستان بیت المال بورڈ اور پنجاب بیت المال بورڈ کے ممبر فرخ زبیر شیخ نے عید پر ملاقات کیلئے آنے والے صحافیوں اور دیگر دوستوں کے ساتھ ملاقات میں کیا۔
انہوں نے پاکستانیوں کو عید الاضحیٰ اور جشن آزادی کی مبارکباد دیتے ہوئے اس عزم کا اظہار کیا کہ پاکستان بیت المال کی طرف سے عوامی فلاح بہبود کے منصوبوں کو تیزی سے پایہ تکمیل تک پہنچانے کے لیے ملک بھر میں دس ہزار یتیم بچوںکی مستقل کفالت کے لیے نئے دارالاحساس کھولے جا رہے ہیں۔ مزید برآں پاکستان بیت المال کے تمام پراجیکٹس اور دی جانے والی درخواستوں کا سٹیٹس معلوم کرنے کے لیے سسٹم کو آن لائن کیا جا رہا ہے اور پہلی بار ٹائم سکیل پروموشن پر کام ہو رہا ہے جس میں پراجیکٹس سٹاف بھی شامل ہے۔ انہوں نے مزید کہا کہ ایم ڈی پاکستان بیت المال عون عباس بپی سوشل میڈیا یا عوام کے ذریعے سامنے آنے والی شکایات کا فوری نوٹس لیتے ہیں۔