مظفرگڑھ۔ (مظفرگڑھ ڈاٹ سٹی۔ 15 جون2020ء) مظفرگڑھ محلہ پرانی بستی تلکوٹ کے ریلوے گراؤنڈ میں عرصہ دراز سے سیوریج کا پانی اکھٹا ہو رہا ہے یہاں کے مکین عرصہ دراز سے مظفرگڑھ کی انتظامیہ کی توجہ سے محروم ہیںجس کی وجہ سے یہاں کے لوگ مختلف بیماریوں اور آمدورفت کے سنجیدہ مسائل کا شکار ہیں ،لیکن آج تک ان لوگوں کی کوئی دادرسی نہیں کی گئی لیکن اب تو حد ہی ہو گئی۔سیوریج کا گندہ پانی تمام رکاوٹیں توڑتا ہوا شہرخاموشاں، بابا پیر پراٹھا شاہ دربار سے ملحقہ قبرستان میں داخل ہو گیا ہے اور مظفرگڑھ شہر کے رہنے والوں کے آباء و اجداد کی قبریں سیوریج کے پانی میں ڈوب گئیں اور کئی قبریں تو سیوریج کے پانی کی وجہ سے بیٹھ گئیں ہیں۔اگر اس گندگی کے سیلاب کو روکنے کے لئے ہنگامی بنیادوں پر کوئی ایکشن نہ لیا گیا تو کچھ دنوں میں ہی یہ مظفرگڑھ شہر کے مکینوں کی آخری آرام گاہ بھی اس گندگی میں غرق ہو جائے گی۔اہل علاقہ کی ضلعی انتظامیہ سے بالخصوص ڈی سی مظفرگڑھ انجینئر امجد شعیب ترین سے پرزور درخواست ہے کہ خدارا ان بے جان و بے بس اس شہر خاموشاں کے باسیوں کی حالت زار پر رحم کریں اور فوری ایکشن لیںکہیں ایسا نہ ہو کہ ان مظلوموں کی آہ و فریاد کسی بھی نقصان کا سبب بن جائے۔