مظفرگڑھ (مظفرگڑھ ڈاٹ سٹی۔ 31 دسمبر2021ء) ڈپٹی کمشنر سید موسیٰ رضا نے کہا ہے کہ ہم اپنی نسل نو کو جدید اور معیاری تعلیم سے آراستہ کرکے ملک کو ترقی کی راہ پر گامزن کرسکتے ہیں انہوں نے کہا کہ دنیا کی قوموں کی ترقی کا راستہ اصل میں تعلیم کا ہی راستہ ہے انہوں نے کہا کہ ترقی یافتہ ممالک کی تمام ترقی اور عروج دراصل علم ہی کی وجہ سے ہے انہوں نے کہا کہ ہم اپنے بچوں کو سائنس وٹیکنالوجی کے حامل جدید علوم سکھا کر اس میدان میں نام پیدا کرسکتے ہیں ۔
ان خیالات کا اظہار انہوں نے آج سنٹر آف ایکسیلینس دانش سکول مظفرگڑھ کے دورہ کے موقع پر اساتذہ اور طلبہ سے گفتگو کرتے ہوئے کیا اس موقع پر سکول کے پرنسپل ماجد کامران سمیت دیگر سٹاف بھی موجود تھا ۔
ڈپٹی کمشنر نے سکول میں جدید آلات سے آراستہ سا?نس لیبارٹری کا افتتاح کیا اور سکول کے لان میں پودا بھی لگایا ۔ڈپٹی کمشنر سید موسیٰ رضا نے کہا کہ سنٹر آف ایکسیلینس دانش سکول مظفرگڑھ نسل نو کی ذہنی آبیاری اور شہر کی علمی ترقی میں اہم کردار ادا کررہا ہے انہوں نے کہا کہ حکومت پنجاب صوبے کے تمام اضلاع کے بچوں کو معیاری تعلیمی سہولیات فراہم کرنے کے لئے کوشاں ہے انہوں نے کہا کہ آج کے بچے ہمارے روشن مستقبل کی ضمانت ہیں انکی بہترین تعلیم و تربیت وقت کی اہم ترین ضرورت ہے انہوں نے کہا کہ نسل نو کو علم کی دولت سے بہرہ مند کرنے والے اساتذہ اور ادارے قومی خدمت کا اہم فریضہ سرانجام دے رہے ہیں۔
انہوں نے کہا کہ جدید علوم کسی بھی ملک اور معاشرے کی ترقی اور خوشحالی کی ضامن ہیں ۔انہوں نے کہا کہ طلبہ لگن اور محنت سے علم حاصل کرکے دنیا میں اپنا نام اور مقام بنا سکتے ہیں۔بعد ازاں ڈپٹی کمشنر نے سکول کے مختلف حصوں کا معائنہ کیا اور سکول انتظامیہ اور اساتذہ کی کاوشوں کو سراہا۔