بچوں کو خسرے سے بچائو کیلئے عوام میں شعوراورآگہی پیداکی جائے ،ڈپٹی کمشنر

مظفر گڑھ۔6اکتوبر(مظفر گڑھ ڈاٹ سٹی۔ 06 اکتوبر2018ء) اپنی آنے والی نسل کو تمام مہلک بیماریوں سے محفوظ بنانے کیلئے اور صحت مند ماحول کی فراہم کرنا ہماری ذمہ داری ہے جس کیلئے محکمہ صحت سمیت تمام متعلقہ اداروں کو اپنا مثبت کردار ادا کرنا ہوگا، یہ بات ڈپٹی کمشنر مظفرگڑھ قیصر سلیم نے ضلع میں شروع ہونے والی خسرے سے بچائو کی خصوصی مہم کے سلسلے میں منعقد ہونے والے ایک اجلاس کی صدارت کرتے ہوئے مزیدکہاکہ اس مہم کو کامیاب بنانے کیلئے ضروری ہے کہ ضلع کے تمام بچوں کو خسرے سے بچائو کے ٹیکے لگانے کو یقینی بنایا جائے ، اس کیلئے عوام میں شعور اور آگہی پیدا کی جائے کہ وہ اس مہم کے دوران خسرے سے بچائو کے لئے بنائے گئے کڈز اسٹیشن پر اپنے بچوں کو لے کر آئیں اور خسرے سے بچائو کے ٹیکے لگوائیں۔انہوں نے کہا کہ یہ ایک قومی فریضہ ہے جس کیلئے ہم سب کو اپنا اپنا ادا کرنا ہے۔ قبل ازیںسی ای او محکمہ صحت ڈاکٹر صدیق بلوچ نے بتایا کہ ضلع مظفرگڑھ میں 15اکتوبر سے 27اکتوبر تک خسرے سے بچائو کی مہم جاری رہے گی ، اس دوران ضلع بھر میں 6ماہ سے 7سال تک کی عمر کی8لاکھ25ہزار بچوں کو خسرے سے بچائو کے ٹیکے لگائے جائیں گے۔ انہوںنے مزید کہا کہ جس علاقے میں یہ ٹیمیں نہ پہنچ سکیں تو 0669299236-239پر رابطہ کیا جاسکتا ہے۔