مظفرگڑھ ۔ 2 دسمبر(مظفرگڑھ ڈاٹ سٹی۔ 02 دسمبر2019ء) ڈپٹی کمشنر مظفرگڑھ انجینئر امجد شعیب خان ترین نے کہا ہے کہ اراضی سنٹر میں عوام کو تمام سہولیات کی فراہمی کو یقینی بنایا جائے، صفائی ستھرائی کی صورتحال کو بہتربنایا جائے، 9بجے سے 12بجے تک تمام افسران اپنے دفاتر میں موجود رہیں، اگر کسی آفیسر کو فیلڈ میں جاناہے تو 12بجے کے بعد جائے، دفاتر میں آنے والے تمام سائلین کے مسائل کو ترجیحی بنیادو ں پر حل کیا جائے۔یہ بات انہو ں نے مظفرگڑھ میں ڈپٹی کمشنر کا چارج لیتے ہی تحصیل کمپلیکس اور اراضی سنٹر کا معائنہ کرتے ہوئے کہی، تحصیل کمپلیکس اور اراضی سنٹر میں صفائی کی ناقص صورتحال پر برہمی کا اظہار کیا اور موقع پر ہی سینٹری انسپکٹر کو بلوا کر تحصیل کمپلیکس اور اراضی سنٹر کی صفائی کروائی۔
اس موقع پر انہوں نے کہا کہ آنے والے سائلین کیلئے بیٹھنے کا معقول انتظام کیا جائے، واش روم میں صفائی اور پانی کی دستیابی کو یقینی بنایا جائے، پینے کے پانی کا انتظام کیا جائے، انہوں نے کہا کہ تمام دفاتر میں خالی احاطوں پر پودے اور گھاس لگائی جائے،گاڑیوں کی پارکنگ کا معقول انتظام کیا جائے۔
ڈپٹی کمشنرانجینئر امجد شعیب خان ترین نے کہا کہ یہ تمام کام ایک دن میں مکمل کئے جائیں وہ کل دوبارہ یہاں کا وزٹ کریں گے۔ اس موقع پر انہوں نے تحصیلدار کو ہدایت کی کہ کسی بھی رجسٹری کو التواء میں نہ رکھا جائے، اعتراض والی رجسٹری جمع نہ کی جائے اور کسی رجسٹری پر ناجائز اعتراض نہ لگایا جائے۔ انہوں نے کہا کہ سنٹر کے ریکارڈ کو محفوظ بنایا جائے،انتقالات کو ایک دن میں مکمل کیا جائے۔