مظفرگڑھ(مظفرگڑھ ڈاٹ سٹی ۔ 24 اگست2021ء) پاکستان کی تاریخ میں پہلی بار کاشتکاروں کوڈائریکٹ کیش سبسڈی پہنچانے کے لئے محکمہ زراعت پنجاب نے کسان کارڈ کا اجراء کر دیا ہے،اس تاریخی اقدام کے ذریعے کاشتکار کھاد اور بیج رعایتی قیمت پر حاصل کر سکیں گے اور کسان کارڈکو اے ٹی ایم پر استعمال کر کے کسان فوری کیش حاصل کر سکے گا۔ان خیالات کا اظہار زراعت آفیسر طلحہ شیخ نے مظفرگڑھ کی سب تحصیل رنگپور کے کاشتکاروں میں کسان کارڈ تقسیم کرتے ہوئے کیا، انہوں نے کہا کہ کسان کارڈ کے ذریعے 10 لاکھ سے زیادہ رجسٹرڈ کاشتکاروں کو سالانہ اربوں روپے کی سبسڈی شفاف انداز میں پہنچائی جا سکے گی۔
کسان کارڈ کے تحت کاشتکار فصل بیمہ تکافل، ای کریڈٹ اور زرعی مداخل کی تمام سبسڈی حاصل کرسکیں گے اور کارڈ کو بطور اے ٹی ایم کارڈ استعمال کرتے ہوئے سبسڈی کی رقم کو فوری وصول کر کے بروقت زرعی مداخل خرید کربروقت اُمور کاشتکاری اور تحفظِ نباتات کو یقینی بنا سکیں گے جس سے فی ایکڑ زرعی پیداوار میں اضافہ اور پیداواری اہداف کا حصول ممکن ہوگا۔
انہوں نے کہا کہ سرکل رنگپور میں دو ہزار سے زائد کاشت کاروں کے کسان کارڈز بن چکے ہیں اور وہ کروڑوں روپے کی سبسڈی بھی وصول کر رہے ہیں۔اس موقع پر طالب حسین، الطاف حسین، قیصر عباس، مختار سیال، ظفر عباس کے علاوہ کثیر تعداد میں کاشت کار بھی موجود تھے۔