مظفرگڑھ (مظفرگڑھ ڈاٹ سٹی۔ 02 ستمبر2022ء) مبینہ قتل کا مقدمہ درج کرنے سے انکار پر مقتولہ کے ورثا ءکا روڈ بلاک کر کے مظاہرہ۔ تھانہ سٹی علی پور کی حدود سے گزشتہ شب ایک خاتون کی مسخ شدہ نعش برآمد ہوئی جس کی شناخت 42 سالہ فیض مائی کے نام سے ہوئی مقتولہ کے رشتہ داروں نے الزام عائد کیا ہے کہ خاتون کو معمولی تلخ کلامی پر اس کے خاوند عبدالمجید نے قتل کرکے نعش ویرانے میں پھینک دی تھی اور مقتولہ 10 روز سے گھر سے لاپتہ تھی۔
پولیس کی طرف سے قتل کا مقدمہ درج کرنے سے انکار پر ورثاء نے نعش کو علی پور کراچی روڈ پر کالج چوک میں سڑک پر رکھ کر زبردست احتجاج کیا اور پولیس کے خلاف نعرے بازی کی اور روڈ کو بلاک کر دیا جس کے نتیجے میں دونوں طرف سے ٹریفک کی طویل قطاریں لگ گئیں۔پولیس کی روڈ کھلوانے کی کوشش پر مظاہرین نے پولیس سے ہاتھا پائی بھی کی۔پولیس نے مظاہرین کو لاٹھی چارج ، تھپڑوں اور مکوں سے تشدد کا نشانا بنا کر کئی گھنٹوں کے بعد روڈ کو ٹریفک کےلئے کھلوا دیا،پولیس تشدد سے متعدد افراد زخمی ہو گئے۔