مظفرگڑھ ۔ (مظفرگڑھ ڈاٹ سٹی ۔ 16 ستمبر2019ء) تھانہ خان گڑھ کے علاقہ بستی میروالا موضع پکا گھلواں میں گزشتہ شب گھر میں جھولے سے غائب ہونے والی 5 ماہ کی بچی کی لاش اگلی صبح مل گئی۔ واقعہ کی اطلاع ملنے پر ڈی ایس پی صدر سرکل عاشق حسین کھوسہ، پولیس تھانہ خان گڑھ، چوکی مونڈکا انچارج عاشق اے ایس ائی موقع پر پہنچ گئے۔ بچی مہوش کی نعش گھر سے کچھ فاصلے پر کھیتوں سے برآمد ہوئی۔
ورثاء کا کہنا ہے کہ بچی کی عمر پانچ ماہ ہے، بچی کی والدہ بچی کو جھولے میں سلا کر گھر کیساتھ والے گھر میں سالگرہ کے فنکشن میں گئی تھی، آدھے گھنٹے بعد مہوش کی امی نے اپنی بڑی بیٹی عائشہ کو کہا کہ بہن کو دیکھ کر آؤ کہ وہ سو رہی ہے، جب عاشہ گھر آئی تو اس نے دیکھا کہ بچی جھولے سے غائب تھی جس پر گھر میں شور مچ گیا۔ ورثاء رات بھر بچی کو ڈھونڈتے رہے، صبح پولیس کو اطلاع دی گئی۔ پولیس نے نعش قبضے میں لے کر پوسٹ مارٹم کیلئے ڈسڑکٹ ہسپتال مظفرگڑھ بھجوا دی۔