مظفرگڑھ (مظفرگڑھ ڈاٹ سٹی۔ 26 ستمبر2019ء) بابائے جمہوریت ،مجاہد ختم نبوت نوابزادہ نصراللہ خان مرحوم کی 16 برسی ملک بھر میں منائی گئی۔ اس سلسلے میں مقامی میرج ہال خان گڑھ میں خصوصی دعائیہ تقریب منعقد ہوئی، جس سے خطاب کرتے ہوئے تحریک انصاف کے ممبر صوبائی اسمبلی اور مرحوم کے صاحبزادے نوابزادہ منصور احمد خان نے کہا کہ نوابزادہ نصراللہ خان وطن عزیز کے پکے نظریاتی اور مخلص سیاستدان تھے ،جنہوں نے وقت کے آمروں سے ٹکر لی۔
نواب صاحب نے مجلس احرار کے پلیٹ فارم سے برصغیر کی آزادی کے لئے جدوجہد میں بھرپور حصہ لیا۔ نوابزادہ نصراللہ خان آخری سانس تک آمروں سے نبرد آزما رہے ،انکی زندگی کی آخری اور شاندار جدوجہد جنرل مشرف کی آمریت کے خلاف تھی۔انہوں نے کہا کہ یہ نوابزادہ صاحب کی سیاسی بصیرت ، دانائی ، حکمت اور سیاسی کرشمہ سازی ہی تھی کہ جس کی وجہ سے وہ ہرمرتبہ ان منتشر اور متحارب سیاسی قوتوں کو متحد کرکے انہیں آمریت کے خلاف ایک طاقت بنانے میں کامیاب ہو جاتے۔