مظفر گڑھ ( مظفر گڑھ ڈاٹ سٹی۔18ستمبر 2014ء) قومی اسمبلی کے رکن جمشید دستی نے ساتھیوں سمیت تھانہ سٹی میں گرفتاری دے دی ہے۔ ان کا کہنا ہے کہ ان کے خلاف جھوٹی ایف آئی آر درج کرائی گئی لیکن اس کے باوجود وہ گرفتاری دے رہے ہیں۔تفصیلات کے مطابق 16 ستمبر کو بند توڑنے کے معاملے پر جمشید دستی اور ان کے 200 نامعلوم ساتھیوں کے خلاف تھانہ سٹی مظفر گڑھ میں ایس ایچ او قیصرحسین کی مدعیت میں دہشت گردی، ڈکیتی، کارسرکار میں مداخلت اور فائرنگ کے الزامات میں مقدمہ درج کیا گیا تھا جس کے خلاف جمشید دستی نے شدید احتجاج بھی کیا تھا۔ان کا کہنا تھا کہ انہیں تحریک انصاف کے دھرنے کی حمایت کی سزا دی جارہی ہے ور ان پر جھوٹے مقدمات قائم کئے جارہے ہیں۔ ذرائع کے مطابق جمشید دستی نے ضلع کچہری چوک پر احتجاج ریکارڈ کرانے کے بعد ساتھیوں سمیت تھانہ سٹی میں چوہدری عامر کرامت، مظفر ناجی اور دیگر ساتھیوں سمیت گرفتاری دیدی۔