مظفرگڑھ (مظفرگڑھ ڈاٹ سٹی۔ 03 ستمبر2022ء) ڈپٹی کمشنرمظفرگڑھ علی عنان قمر نے کہا ہے کہ لڑکیوں کو تعلیم کی فراہمی والدین کے ساتھ ساتھ معاشرے کی بھی ذمہ داری ہے تاکہ وہ خود مختیار بن سکیں اور ملکی معیشت میں اپنا مثبت کردار ادا کرسکیں ۔یہ بات انہوں نے عالمی یوم خواندگی کے حوالے سے ضلع کونسل کے جناح آڈیٹوریم میں ایک تقریب سے خطاب کرتے ہوئے کہی۔
تقریب کا اہتمام محکمہ لٹریسی اور نیشنل کمیشن فار ہیومن ڈویلپمنٹ کی طرف سے کیا گیا تھا۔ ڈپٹی کمشنر نے بنگلہ دیشن کی مثال دیتے ہوئے کہا کہ بنگلہ دیش کی ترقی میں اور معیشت مستحکم بنانے میں خواتین نے کلیدی کردار ادا کیا ہے۔ انہوں نے کہا کہ غربت کے خاتمے کیلئے ہر فرد کو خواندگی کی ضرورت ہے ہر مرد و عورت کو پڑھنا لکھنا سیکھنا ہے۔
انہوں نے کہا کہ ہمیں خواتین کی صلاحیتوں سے فائدہ اٹھانا چاہیے۔
انہوں نے کہا کہ پاکستان میں خواندگی کی شرح 60فیصد سے زائد ہے اور یہ بات خوش آئند ہے کہ ضلع مظفر گڑہ میں گذشتہ سالوں سے سکولوں میں داخلے کی شرح میں بہتری آرہی ہے۔ تقریب سے سی ای او تعلیم مسعود ندیم، ڈی او لٹریسی طاہرہ رفیق، ملک خیر محمدبدھ نے بھی خطاب کیا اور خواندگی کی شرح میں اضافے کیلئے نان فارمل سکولوں کی اہمیت پر روشنی ڈالی۔ تقریب میں بچوں نے ٹیبلو اور خاکے بھی پیش کئے۔