مظفر گڑھ (مظفرگڑھ ڈاٹ سٹی ۔ 10 ستمبر2021ء) آل پاکستان کسان اتحاد کے مرکزی سیکرٹری جنرل رانا محمد ظفر طاہر، صوبائی سیکرٹری اطلاعات پنجاب رانا امجد علی امجد ایڈووکیٹ ، صوبائی آرگنائزر سندھ راجہ غلام نبی آفتاب ،صوبائی صدر میاں محمد یسین سکھیرا اور صوبائی سیکرٹری جنرل سید محمود الحسن شاہ نے کہا ہے کہ 37 دن کی بلنگ مجرمانہ فعل ہے، بجلی کی تقسیم کار کمپنیوں کے چیفس اور دیگر ذمہ داران کے خلاف نیب کارروائی کرے اور کسانوں اور عوام سے لوٹی گئی رقم واپس دلائی جائے، بجلی کی قیمتوں میں اضافے کو روکا جائے۔
جاری اعلامیہ کے مطابق آل پاکستان کسان اتحاد اس بارے احتجاجی لائحہ عمل کا جلد اعلان کرے گا، کسان راہنماؤں نے کہا کہ بجلی کے بل میں تیکنیکی چیز یونٹس کی حد(سلیب) ہوتی ہے جسے بڑھا کر غریب عوام کی جیبوں پر ڈاکہ ڈالا جارہا ہے۔
37 دن کی بلنگ مجرمانہ فعل ہے۔ کیا نیب کو یہ ڈاکہ نظر نہیں آ رہا ۔ انہوں نے کہا کہ سرکاری ادارے بالخصوص بجلی کی کمپنیاں ایک عرصے سے لوٹ مار کر رہی ہیں، اس بارے آل پاکستان کسان اتحاد نے آواز بلند کی، لیکن حکومتی ادارے ٹس سے مس نہیں ہوئے، انہوں نے مطالبہ کیا کہ حکومت جلد از جلد اس سکینڈل کی تحقیقات کر کے عوام کے سامنے پیش کرے اور ذمہ داران کو نشان عبرت بنایا جائے اور بجلی کی قیمتوں میں اضافے کے سلسلے بھی بند کئے جائیں، ورنہ کسان سڑکوں پر نکل کھڑے ہونگے۔