مظفرگڑھ (مظفرگڑھ ڈاٹ سٹی 20 جنوری2023ء) ڈی پی او احمد نواز شاہ نے تھانہ رنگپور میں شہریوں کی سہولت کیلئے ویٹنگ ہال کا افتتاح اور کھلی کچہری کا انعقاد کیاہے۔ڈی پی او احمد نواز شاہ نے کھلی کچہری میں گفتگو کرتے ہوئے کہا کہ شہریوں کوان کی دہلیز پر انصاف فراہم کیا جائیگا اور ان کی سہولیات کیلئے تمام تر اقدامات کیئے جائینگے۔
پولیس ترجمان کے مطابق ڈی پی او نے تھانہ رنگ پور میں ویٹنگ ہال کا افتتاح کیا ہے، ویٹنگ ہال کی تعمیر کا مقصد انصاف کیلئے دور درازسے آئے شہریوں کو آرام دہ ماحول فراہم کر کے انصاف کی فراہمی کو یقینی بنانا ہے۔ بعدازاں ڈی پی او نے کھلی کچہری کا انعقاد کیا ،جس میں ایس ایچ او تھانہ رنگپور جاوید اقبال مکول اور تمام تفتیشی افسران نے شرکت کی۔
کھلی کچہری میں میڈیا نمائندگان،انجمن تاجران اور شہریوں کی بڑی تعداد نے شرکت کی۔کھلی کچہری میں شہریوں کی طرف سےدی گئی 15 سے زائد درخواستیں پیش کی گئیں جن کے مسائل کے حل کیلئے فوری طور پر احکامات جاری کئے گئے۔ ڈی پی او کا کہنا تھا کہ بر وقت انصاف کی فراہمی لوگوں کو حق اور انصاف ان کی دہلیز پرمہیا کرنا پولیس کا اولین فرض ہے ،عوام کے مسائل اور پولیس سے متعلق شکایات کے لئے میرے دفتر کے دروازے بھی ہمیشہ عوام کے لئے کھلے ہیں۔