مظفرگڑھ (مظفرگڑھ ڈاٹ سٹی۔ 16 دسمبر2019ء) پولیس ملازمین کے ڈسپلن اورٹرن آؤٹ کو بہتر بنانے کے لئے پولیس پریڈ گراونڈ میں ڈی پی او مظفرگڑھ ندیم عباس کی زیر نگرانی جنرل پریڈ کا انعقاد،پولیس ملازمان کے ڈسپلن اورٹرن آؤٹ کو بہتر بنانے کے لئے پولیس لائن پریڈ گراونڈ میں جنرل پریڈ کا انعقاد کیا گیا جس میں ضلع پولیس کے ساتھ ساتھ ، ٹریفک پولیس، ایلیٹ فورس اور لیڈیز پولیس کے دستے بھی شامل تھے ۔ڈی پی او مظفرگڑھ ندیم عباس نے پریڈ اور جوانوں کے ٹرن آوٹ کا معائنہ کیا اور چبوترے پر سلامی لی۔
جنرل پریڈ میں آئے پولیس افسران و ملازمان سے خطاب کرتے ہوئے انہوں نے کہا کہ اپنے فرائض کو دیانتداری اور خدمت خلق سمجھ کر سر انجام دیں، ہمارا مقصد عوام کی جان ومال کی حفاظت کرنا ہے اور اس ملک و قوم کی رکھوالی کے لیے ہم کسی بھی قسم کی قربانی سے دریغ نہیں کریں گے۔ایک پولیس والے کا اچھا اخلاق ساری فورس کے لیے عزت اور نیک نامی کا باعث بنتا ہے۔ جبکہ برا اخلاق اور رویہ محکمہ کی بدنامی اور بے عزتی کا باعث بنتا ہے۔ تمام ملازمین اپنی صحت کا خصوصی خیال رکھیں اچھی خوراک اور صاف ستھرے پانی کا استعمال کریں۔ آپ کی صحت آپ کے خاندان، محکمہ اور معاشرہ کے لیے از حد ضروری ہے۔