News

ڈی ایچ کیو ہسپتال مظفرگڑ ھ میں ایمرجنسی کے حوالے جدیدسہولیات فراہم کرنے کی کوشش کرینگے، حنا ربانی کھر

مظفرگڑھ(مظفرگڑھ ڈاٹ سٹی۔ 20 مارچ2023ء) وزیرمملکت برائے امور خارجہ حنا ربانی کھر نے کہا ہے کہ پاکستان میں صحت اور تعلیم کی سہولیات کے حوالے سے لوگوں کو مشکلات درپیش ہیں، ڈی ایچ کیو ہسپتال مظفرگڑ ھ میں فراہم کی جانے والی سہولیات بہتر ہیں مگر یہاں کارڈیالوجی کے شعبے میں سہولیات کی سخت ضرورت ہے،ایمرجنسی کے حوالے جدیدسہولیات فراہم کرنے کی کوشش کریں گے، مظفرگڑ ھ میں مدر اینڈ چائلڈ ہسپتال بھی ضرور بنے گا۔

ان خیالات کا اظہار انہوں نے پیر کو مظفرگڑ ھ کے ڈی ایچ کیو ہسپتال اور پنجاب ٹیکنیکل اینڈ ووکیشنل کالج (ٹیوٹا)کے دورے کے بعد میڈیا سے گفتگو کرتے ہوئے کیا۔وزیرمملکت نے ہسپتال اور کالج میں مختلف شعبوں کا معائنہ کیا۔ سی ای او ہیلتھ ڈاکٹر ظفر عباس،ایم ایس ڈاکٹر ضیاء الحسن اور پی ایم اے کے جنرل سیکرٹری ڈاکٹر یوسف نسیم لغاری نے وزیرمملکت حنا ربانی کھر کو ہسپتال کے حوالے سے بریفنگ دی۔

ڈاکٹر ضیاء الحسن نے کہا کہ ایکسرے کی ڈیجیٹل فلمیں ایل سیز پر پابندی کے باعث پورٹ پر پھنسی ہوئی ہیں،جبکہ ڈالر بڑھنے کے باعث بھی فلموں کی قیمتوں میں اضافہ ہوا ہے جس کی وجہ سے بھی مشکلات بڑھی ہیں،ہسپتال انتظامیہ نے وزیرمملکت کو ہسپتال میں عملے،وسائل کی کمی اور مشکلات سے آگاہ کیا۔وزیرمملکت حنا ربانی کھر کا کہنا تھا کہ وہ اس حوالے سے متعلقہ حکام سے بات کریں گی۔