مظفرگڑھ(مظفرگڑھ ڈاٹ سٹی۔ 03 فروری2023ء) چیف ایگزیکٹیو آفیسر صحت مظفرگڑھ ڈاکٹر اقبال ساجد نے کہا ہے کہ اگر ہم کسی بھی بیماری، وبا یا وائرس کے پھیلنے سے پہلے حفاظتی اقدامات کر لیں تو بہت سے جانی نقصانات سے بچا جاسکتا ہے، یہ بات انہوں نے ڈینگی کے مرض سے بچاؤ کے سلسلے میں ضلعی محکموں کے فوکل پرسنز کی تربیتی ورکشاپ سے خطاب کرتے ہوئے کہی۔
انہوں نے کہا کہ ڈینگی سے بچاؤ کیلئے حفاظتی اقدامات کرنا اور عوام میں اس سے بچاؤ کا شعور وآگاہی بیدار کرنا ہماری ذمہ داری ہے۔انہوں نے کہا کہ تمام فوکل پرسن اپنے اپنے علاقوں میں دیانتداری سے کام کریں، روزانہ کی بنیاد پر مختلف جگہوں کو معائنہ کریں جہاں کہیں بھی ڈینگی مچھروں کا لاروا پایا جائے فوری طور پر محکمہ صحت کا آگاہ کیا جائے تاکہ مناسب اقدامات کئے جاسکیں۔
اس موقع پر ڈسٹرکٹ انٹامالوجسٹ ڈاکٹر سراج احمد نتکانی نے بتایا کہ گذشتہ سال ضلع مظفرگڑھ میں ڈینگی کے 4مریض سامنے آئے تھے جس کا مطلب ہے کہ ضلع میں ڈینگی وائرس اب بھی موجود ہے، اب ہمیں زیادہ احتیاط کی ضرورت ہے۔ انہوں نے کہا کہ گندے پانی پر اسپرے کرایا جائے، صاف پانی کو ڈھانپ کر رکھا جائے،شہری پوری آستین کے کپڑے پہنیں، بخار کی صورت میں فوری طور پر ڈاکٹر سے رجوع کیا جائے۔ورکشاپ میں ضلعی محکموں کے ڈینگی سے متعلقہ فوکل پرسنز نے شرکت کی۔