مظفر گڑھ۔28 نومبر(مظفر گڑھ ڈاٹ سٹی۔ 28 نومبر2017ء) ڈپٹی ڈسٹرکٹ آفیسر ٹیکنیکل بہبود آبادی ڈاکٹر عمارہ نے کہا ہے کہ چھوٹا خاندان خوشحالی کا ضامن ہے ، بچوں کے درمیاں مناسب وقفے سے ماں اور بچے کی صحت پر مثبت اثرات مرتب ہوتے ہیں۔یہ بات انہوں نے لیڈی ہیلتھ وزیٹرز، لیڈی ہیلتھ سپروائزراور لیڈی ہیلتھ ورکرز کی تولیدی صحت اور چھوٹے خاندان سے متعلق ایک تربیتی ورکشاپ سے خطاب کرتے ہوئے کہی۔انہوں نے کہا کہ تولیدی صحت اور چھوٹے خاندان کی عوام میں آگاہی کیلئے لیڈی ہیلتھ وزیٹرز، لیڈی ہیلتھ سپروائزراور لیڈی ہیلتھ ورکرز اہم کردار ادا کرسکتی ہیں۔ انہوں نے کہا کہ معاشی اور معاشرتی ترقی کیلئے ضروری ہے کہ ہم اپنے خاندان کو چھوٹا رکھیں تاکہ عام آدمی کو بنیادی سہولیات برابری کی سطح پر دستیاب ہو سکیں۔ ورکشاپ سے ڈپٹی ڈسٹرکٹ آفیسرسی اینڈ ٹی محمد ناصر نے اسلام میں خاندانی منصوبہ بندی پر لیکچر دیا، جاوید اختر ڈیمو گرافر نے بھی لیکچر دیا۔ اس موقع پر عباس بلوچ سمیت محکمہ صحت کی لیڈی ہیلتھ وزیٹرز، لیڈی ہیلتھ سپروائزراور لیڈی ہیلتھ ورکرزکی کثیر تعداد نے شرکت کی۔