مظفر گڑھ۔(مظفر گڑھ ڈاٹ سٹی۔ 17 اکتوبر2018ء) ڈپٹی ڈائریکٹر سوشل ویلفیئر آفیسر چوہدری اظہر نے کہا ہے کہ چائلڈ لیبر کے سدباب کیلئے چائلڈ لیبر قوانین اور حکومت پنجاب کے احکامات پر سختی سے عمل درآمد کرایا جائیگا اور کسی کو بھی قانون کی خلاف ورزی کی اجازت نہیں دی جائیگی۔ انہوں نے ان خیالات کا اظہار چائلڈ لیبر کے سلسلے میں منعقد ہونیوالی تقریب سے خطاب کرتے ہوئے کیا۔انہوں نے کہا کہ حکومت پنجاب نے محکمہ سوشل ویلفیئر اور لیبر ڈیپارٹمنٹ کو سختی سے ہدایت کی ہے کہ چائلڈ لیبر کے خاتمہ کیلئے ہمہ گیر اقدامات کیے جائیں اور غریب گھرانوں کے نا بالغ بچوں کو محنت مزدوری سے نجات دلا کر تعلیمی اداروں میںداخل کرایا جائے جن کے تمام تر تعلیمی اخراجات بھی حکومت برداشت کریگی۔چوہدری اظہر نے کہا کہ غریب گھرانوں کو حکومت کی اس سہولت سے فائدہ اٹھاتے ہوئے اپنے بچوں کو مزدوری پر لگانے کی بجائے تعلیمی اداروں میں داخل کرانا چاہیے تاکہ ان کے بچے بھی اعلیٰ تعلیم حاصل کر کے اپنا مستقبل سنوار سکیں۔تقریب سے پیپلز ویلفیئر کونسل کے صدر خالد عباسی ، محکمہ محنت کی موبلائیزر سلمیٰ مجید، حاجی نیاز حسین، محمد عرفان خانزادہ اور کئی دوسرے سماجی رہنمائوں نے بھی خطاب کیا۔تقریب کے اختتام پر چائلڈ لیبر کے خاتمہ کیلئے پیپلز ویلفیئر کونسل کے صدر خالد عباسی کی قیادت میں واک کا بھی اہتمام کیا گیا۔