مظفرگڑھ۔ (مظفر گڑھ ڈاٹ سٹی۔ 21 دسمبر2018ء) تحریک انصاف کے رکن صوبائی اسمبلی حلقہ پی پی 276 مظفرگڑھ سردار عون حمید ڈوگر نے پریس کلب خان گڑھ کے پروگرام میٹ دی پریس میں بتایا کہ پی ٹی آئی کی حکومت نے صوبہ میں متعین کردہ پہلے سو دن کے اہداف کامیابی سے حاصل کر لئے ہیں، جبکہ وزیر اعلیٰ پنجاب سردار عثمان بزدار جنوبی پنجاب کی ترقی کیلئے عملی طور پر کوشاں ہیں۔ترقیاتی بجٹ 380 ارب روپے کا رکھا گیا ہے،سابق حکمران خزانہ خالی کر گئے۔ حکومتی پالیسیوں کے اثرات بتدریج سامنے آئیں گے۔ بہت جلد عوام کو ریلیف ملنا شروع ہو گا،سابق تحصیل ناظم اور پی ٹی آئی کے راہنماء سردار محمد آباد ڈوگر نے کہا کہ وہ خود اور ان کے ایم پی اے اور چیئرمین بلدیہ خان گڑھ اپنا احتساب کیلئے ہمہ وقت حاضر ہیں اور اگر کوئی کرپشن کی ہے تو اس کا حساب دینے کو تیار ہیں۔عوام اور کوئی بھی ادارہ ان کا کھلے بندوں احتساب کر سکتا ہے۔چیئر مین بلدیہ سید طاہر عباس بخاری نے کہا کہ شہر میں تجاوزات اور قبضہ مافیا کے خلاف بلا امتیاز آپریشن جاری ہے اور کوئی دباو قبول نہیں کیا جائیگا،صدر مجلس شہریاں رانا امجد علی امجد ایڈووکیٹ نے کہا کہ اراکین اسمبلی مظفرگڑھ تا ہیڈ پنجند علی پور تک جی ٹی روڈ,قومی شاہراہ جو اب حادثات کے باعث قاتل روڈ بن چکی ہے اس کو دو رویہ بنوانے کے لئے مل کر حکومت سے منظوری اور فنڈز حاصل کریں جس پر ایم پی اے عون حمید ڈوگر نے یقین دلایا کہ وہ اس بارے میں وزیر اعلی سے خصوصی درخواست کریں گے۔اس موقع پر صدر پریس کلب ملک رضوان الرحمن, عرفان اللہ خان,ملک عبدالغفور سندیلہ,عطائ اللہ لوہانی,شاہد حسین خان,قاری خالد محمود,سابق کونسلر اعجاز احمد درانی,فاروق احمد شیروانی,سہیل امیر خان محمد یعقوب لودھی’ معظم ڈوگر ودیگران نے بھی اظہار خیال کیا۔