مظفرگڑھ۔(مظفرگڑھ ڈاٹ سٹی ۔ 05 نومبر2021ء) :سیکرٹری لوکل گورنمنٹ جنوبی پنجاب محمد الطاف بلوچ نے کہا ہے کہ وزیر اعلیٰ پنجاب کی خصوصی مہم ویکسین آپکی دہلیز پر کے مثبت نتائج آرہے ہیں جس کی وجہ سے کورونا کے مرض کی شرح میں خاطر خواہ کمی سامنے آئی ہے۔ یہ بات انہوں نے ڈی سی آفس مظفرگڑھ میں ویکسین آپکی دہلیز پر خصوصی مہم کے ایک جائزہ اجلاس کی صدار کرتے ہوئے کہی۔
اس موقع ہر ڈپٹی کمشنرمظفرگڑھ سید موسیٰ رضا بھی ان کے ساتھ تھے۔
اجلاس میں ممبران صوبائی اسمبلی میاں علمدار عباس قریشی، اشرف رند اور نیاز احمد گشکوری نے بھی شرکت کی۔ سیکرٹری لوکل گورنمنٹ نے کہاکہ صوبہ سے کورونا کے مستقل خاتمے کیلئے یہ خصوصی مہم ایک جامع پروگرام ہے جس کے تحت محکمہ صحت کی ٹیمیں گھر گھر جا کر گھر کے تمام افراد کو ویکسین لگارہی ہیں جس کے مثبت نتائج سامنے آئے ہیں۔ انہوں نے کہا کہ عوامی نمائندگان لوگوں میں اس کاشعو ر اجاگر کریں کہ عوام خود سنٹر پر جائیں اور ویکسین لگوائیں تاکہ مقررہ وقت میں مطلوبہ نتائج حاصل ہوں اورہم پانچویں لہرسے محفوظ رہیں۔