مظفرگڑھ (مظفرگڑھ ڈاٹ سٹی۔ 04 اکتوبر2022ء) وزیر اعلیٰ کے معاون خصوصی طارق زمان گجر نے کہا ہے کہ وزیر اعلیٰ پنجاب چوہدری پرویز الہٰی کی اولین ترجیح عوام کی فلاح و بہبود ہے۔یہ بات انہوں نے مظفرگڑھ کے دورہ کے موقع پر تحصیل آفس، لینڈریکارڈ سنٹر اور ڈسٹرکٹ ہیڈ کوارٹر ہسپتال کا معائنہ کرتے ہوئے کہی۔ اس موقع پر ضلعی صدر پاکستان مسلم لیگ ق نذر مغیث اور غلام علی بخاری بھی ان کے ہمراہ تھے۔
انہوں نے کہا کہ وزیر اعلیٰ کے پورٹل پر مختلف شکایات موصول ہورہی تھیں جس پر انہوں نے مظفرگڑھ کا دورہ کیا ہے۔ انہوں نے کہا کہ چوہدری پرویز الہٰی کے وژن کے مطابق کسی محکمہ میں کرپش کو برداشت نہیں کیا جائے گا، تحصیل آفس میں رجسٹری فیس، ٹیکس کی کٹوتی اور وزیر اعلیٰ پنجاب کی طرف سے فراہم کردہ ریلیف کا چارٹ آویزاں کیا جائے تاکہ سائل کو پتا ہو کہ اس نے کتنی فیس جمع کرانی ہے۔ انہوں نے کہا کہ تحصیل آفس، رجسٹری برانچ اور لینڈ ریکارڈ سنٹر میں ٹاؤٹ مافیا کے داخلے پر پابندی عائد کی جائے اور ان کی حوصلہ شکنی کی جائےتا کہ عوام کا اداروں پر اعتماد بحال ہو۔