مظفر گڑھ ۔ (مظفر گڑھ ڈاٹ سٹی۔ 21 اکتوبر2017ء) ڈپٹی کمشنر مظفر گڑھ سیف انور نے کہا ہے کہ بچے ہمارا قیمتی سرمایہ ہیں اور مستقبل کے معمار ہیں۔ ان کی بہتر تعلیم و تربیت ہمارا فریضہ ہے ۔ انہوں نے کہاکہ یہ نونہالان وطن محنت لگن اور والدین اور اساتذہ کے حکم کی تعمیل کرکے دنیا وآخرت میں کامیابی حاصل کر سکتے ہیں ۔ان خیالات کااظہار انہوں نے ہفتہ کو اپنے دفتر میں مختلف سکولوں کے بچوں سے ملاقات کے دوران کیا۔اس موقع پر بچوں نے ڈپٹی کمشنر سے ان کے بچپن اور سکول کی زندگی کے حوالے سے سوالات کیے ۔ڈپٹی کمشنر سیف انو نے اس موقع پر بچوں کے سوالوں کے جوابات دیتے ہوئے کہا کہ انہوں نے محنت لگن اور والدین کی دعاؤں سے یہ مقام حاصل کیا ہے ۔انہوں نے کہا کہ بچے اپنی تمام تر توجہ علم کے حصول پر مرکوز کر یں تاکہ وہ اچھے انسان اور مفید شہری بن کر اپنے والدین اور ملک کی خدمت کر سکیں ۔انہوں نے بچوں کو نصیحت کی کہ وہ زندگی میں ہمیشہ سچ بولیں اور اپنے والدین اور اساتذہ کا حکم مانیں۔ انہوں نے کہا کہ بچے وقت کی پابندی محنت اور دیانتداری کو اپنی زندگی کا اصول بنائیں ۔انہوں نے کہاکہ آج ان معصوم بچوں سے ملکر انھیں اپنا بچپن یاد آگیا ہے ۔انہوں نے کہا کہ شہر میں واقع فیاض پارک کی بحالی اور تعمیر و مرمت کا کام جلد شروع کیا جا رہا ہے۔انہوں نے کہا کہ شہر میں ٹریفک کا مسئلہ بھی جلد حل کیا جائے۔