نامعلوم قاتل نے کھیتوں میں چارہ کاٹتی خاتون کو قتل کر دیا

مظفرگڑھ (مظفرگڑھ ڈاٹ سٹی۔ 15 مارچ2023ء) کوٹ ادو کے نواحی علاقے میں نامعلوم ملزم نے کھیتوں میں کام کرتی خاتون کو گلا گھونٹ کر قتل کردیا۔

پولیس ذرائع کے مطابق کوٹ ادو کے نواح میں پل 88 ہزار کے علاقے میں زوجہ ملک محمد یوسف چننڑ جانوروں کیلئے کھیتوں میں چارہ کاٹ رہی تھی کہ اسی اثناء میں کسی نامعلوم شخص نے پیچھے سے آکر اسے گلا گھونٹ کر قتل کردیا جسکی موت کا علم ہوتے ہی لواحقین نے فوری طور پر پولیس کو اطلاع کردی۔

ڈی ایس پی کوٹ ادو ثناءاللہ خان اور ایس ایچ او تھانہ سٹی کوٹ ادو سب انسپیکٹر چوہدری اصغر نے موقع پر پہنچ کر قانونی کارروائی شروع کردی۔پولیس کرائم سین یونٹ اور فارنزک ٹیم نے موقع واردات سے شواہد اکٹھے کرکے لاش کو پوسٹ مارٹم کے لیے ڈسٹرکٹ ہیڈکوارٹر ہسپتال کوٹ ادو منتقل کردیا۔اس حوالے سے ڈی ایس پی کوٹ ادو کا کہنا تھا کہ پولیس نے جائے وقوعہ سے اہم شواہد اکٹھے کر لئے ہیں۔