مظفر گڑھ(مظفر گڑھ ڈاٹ سٹی۔11فروری 2015ء) ایک نجی ٹی وی چینل کے مطابقمظفر گڑھ کے علاقے بیما والا ٹبہ میں رہنے والا ایک نوجوان سیف الدین شاہ چھ ماہ قبل لا پتہ ہو گیا تھا ۔ چھ ماہ کے بعد نوجوان کے والد کی نشاندہی پر لا پتہ ہونے والے نوجوان کی لاش مشتاق نامی شخص کے گھر سے بر آمد کی گئی ہے ۔ نوجوان کے والد کا کہنا ہے کہ مشتاق جمشید دستی کا ڈرائیور ہے۔پولیس نھے مقتول نوجوان کے والد اور بھائی کی درخواست پر جمشید دستی اور ان کے ڈرائیور سمیت تین افراد کے خلاف مقدمہ درج کر لیا ہے ۔ مقتول کے بھائی کا کہنا تھا کہ سیف نے چھ ماہ قبل پسند کی شادی کی تھی شادی کے تین ماہ کے بعد سیف کے سسرالیوں نے اسے گھر بلا کر قتل کر دیا ۔ مقتول کے بھائی نے یہ موقف دیا ہے کہ یہ قتل جمشید دستی کے ایما پر کیا گیا ہے۔ اس کے بر عکس جمشید دستی نے اپنے اوپر لگے الزامات کے جواب میں کہا کہ میں ایک غریب طبقے سے تعلق رکھتا ہوں اور میرے پاس کوئی گاڑی نہیں ہے تو ڈرائیور کہاں سے آئے گا؟ جمشید دستی کا کہنا تھا کہ میرے خلاف علاقے کے جاگیر داروں نے مقدمہ درج کروایا ہے تا کہ مجھے عدالت کے چکروں میں الجھایا جا سکے۔