مظفر گڑھ (مظفرگڑھ ڈاٹ سٹی ۔ 26 مئی2022ء) ناجائز تعلقات استوار کرنے سے انکار پر تیزاب گردی کا شکار ہونے والی خاتون 18 دن زندگی اور موت کی کشمکش میں مبتلا رہنے کے بعد چل بسی۔تھانہ سٹی کوٹ ادو کی حدود میں خاتون اور اس کے بیٹے پر گھر میں رات کی تاریکی میں تیزاب پھینکا گیا تھا۔پولیس نے مقدمہ درج کرکے تینوں نامزد ملزمان رانا سکندر حیات،رانا اسد حیات پسران رانا محمد اشرف اور رانا آصف ولد رانا غلام یاسین کو گرفتار کرلیا تھا۔
یاد رہے کہ 8 مئی کو 26 سالہ نسرین مائی زوجہ عبدالرشید اپنی والدہ نسیم بی بی زوجہ ظفر عباس کے گھر اپنے خاوند اور 12 سالہ بیٹےجہانزیب کے ساتھ صحن میں سوئی پری تھی کہ رات سوا دو بجے تینوں ملزمان گھر کی دیوار پھاند کر اندر داخل ہوئے اور نسرین بی بی اور اس کے 12 سالہ بیٹے پر تیزاب پھینک دیا ان کے چیخنے چلانے پر مسمات نسیم بی بی اور اس کا شوہر جو کہ اندر کمرے میں سو رہے تھے بھاگ کر آئے تو ملزمان جن کے ہاتھ میں تیزاب والا سفید رنگ کا کین تھا انہیں دھمکیاں دیتے ہوئےفرار ہو گئے۔
خاتون کو بغرض علاج معالجہ برن یونٹ نشتر ہسپتال ملتان ریفر کیا گیا تھا جہاں 18 دن زندگی اور موت کی کشمکش میں مبتلا رہنے کے بعد نسرین بی بی نے دم توڑ دیا ہے۔اس کے 12 سالہ بیتے جہانزیب کی حالت اب بہتر ہو رہی ہے، تینوں ملزمان ریمانڈ جوڈیشل پر جیل میں بند ہیں۔مزید ملزمان کو ٹریس کرنے کے لئے سی سی ٹی وی فوٹیج ، سی ڈی آر اور جیو فینسنگ سے مدد لی جارہی ہے۔پولیس متوفیہ خا تون کے والدین سے مسلسل رابطے میں ہےجبکہ خاتون کے والدین نے پولیس تفتیش پر مکمل اعتماد کا اظہار کیا ہے۔