مظفر گڑھ۔(مظفر گڑھ ڈاٹ سٹی۔ 16 اکتوبر2018ء) پاکستان ایک ذرخیز اورقدرتی وسائل سے بھر پور ملک ہے اگر ہم احساس ذمہ داری اور باہم معاونت سے کام کریں تو ملک سے غذائی قلت کا خاتمہ کرسکتے ہیں، یہ بات ایڈیشنل ڈپٹی کمشنر فنانس اینڈ پلاننگ آصف الرحمان نے محکمہ خوراک کے زیر اہتمام ضلع کونسل ہال میں مظفرگڑھ میں خوراک کے عالمی دن کے موقع پر ایک تقریب سے خطاب کرتے ہوئے کہی، انہوںنے کہا کہ آج ہم نے یہ عہد کرنا ہے کہ گذشتہ ادوار میں کی جانی والی غلطیوں سے سبق سیکھنا ہے اور نہ صر ف موجودہ دور کی غذائی قلت کو ختم کرنا ہے بلکہ اپنی آنے والی نسل کو بھی غذائی قلت سے محفوظ بنانا ہے ، انہوں نے کہا کہ محکمہ خوراک کے ساتھ ساتھ محکمہ زارعت ، محکمہ لائیو سٹاک ، محکمہ تعلیم ، محکمہ بہبود آبادی اور دیگر محکمہ جات کے تعاون سے غذائی قلت پر قابو پانے کیلئے عملی اقدامات کرنا ہیں۔اسسٹنٹ فوڈ کنٹرولر محمد علی شاہین نے خوراک کی پیداواراور اسکی غذائیت کو برقرار رکھنے ، خوراک کو ذخیرہ کرنے اور عوام تک معیاری اور غذائیت سے بھر پر خوراک فراہم کرنے کیلئے محکمہ خوراک اور حکومت پنجاب کی طرف سے کئے جانے والے اقدامات بارے شرکا ء کو آگاہ کیا، محکمہ پلاننگ اینڈڈویلپمنٹ سے عبدالقیوم اور دوآبہ فائونڈیشن سے کلثوم نوازنے غذائی قلت اور خوراک میں غذائی اجزاء کی کمی کے بارے میں کئے گئے سروے کے اعداد و شمار سے آگاہ کیا اور بتایا کہ بچوں میں غذائی قلت حاملہ خواتین کو مناسب خوراک نہ فراہم کئے جانے کی وجہ سے ہوتی ہے اگر دو سال کی عمر تک اس کا علاج نہ کرایا جائے تو یہ لاعلاج ہوجاتا ہے۔بعد ازاں ایڈیشنل ڈپٹی کمشنر کی قیادت میں غذائی قلت سے بچنے کیلئے عوام میں شعور بیدار کرنے کیلئے واک کی گئی ، جس میں ڈسٹرکٹ فورڈ کنٹرولرملک ممتاز وینس ، سینئر نائب صدر ایپکا مظفرگڑھ محمد اکرم بدھ سمیت محکمہ خوراک کے افسران نے شرکت کی۔