مظفرگڑھ (مظفرگڑھ ڈاٹ سٹی۔ 31 دسمبر2022ء) مظفرگڑھ پولیس نے مختلف کارروائیوں میں 5 منشیات فروشوں کو گرفتار کر لیا ہے ۔ایس ایچ او تھانہ رنگپور جاوید مکول نےٹیم کے ہمراہ شراب فروش ظفر اقبال سے 15 بوتلیں ولائیتی شراب کی برآمد کر کے مقدمہ درج کر کےملزم کو گرفتار کر کے حوالات تھانہ بند کر دیا ۔
ایک اور کارروائی میں ڈی ایس پی جتوئی سرکل نصراللہ بابر کی زیر نگرانی ایس ایچ او تھانہ جتوئی ارشد منیر نے اپنی ٹیم کے ہمراہ کارروائی کرتے ہوئے شراب فروشوں ملزمان محمد جاوید، ارشد حسین، محمد عارف اور محمد اسلم سے 4 چالو بھٹیاں سمیت 425 لیٹر دیسی شراب اور 335 لیٹر لہن برآمد کر کے علیحدہ علیحدہ مقدمات درج کر کے تمام ملزمان کو گرفتار کر کے حوالات تھانہ بند کر دیا ہے۔
اس موقع پرڈی ایس پی جتوئی سرکل نصراللہ بابر کا کہنا تھاکہ پولیس منشیات فروشوں کے خلاف کارواٸیوں کا سلسلہ مستقل بنیادوں پر جاری رکھے گی۔ منشیات و شراب فروش معاشرے کا ناسور ہیں اور پولیس معاشرے میں امن و امان کیلئے کوشاں ہے اور عوام کی جان و مال اور عزت کی حفاظت کیلئے ہر وقت تیار ہے اور 24 گھنٹے الرٹ ہے۔کسی مشکوک سرگرمی کی صورت میں پولیس ہیلپ لائن 15پر کال کر کے اطلاع دیں اور ذمہ دار شہری ہونے کا ثبوت دیں۔